Dünya ona, o isə rejissora heyrandır

Məşhur Hollivud aktyoru Cim Kerri "Maska" filminin rejissoru Çak Rasselə olan hörmətindən danışıb.

Publika.az xəbər verir ki, onun açıqlaması "Variety" jurnalında dərc olunub.

Aktyor deyib: "Maska" filminin çəkilişi zamanı çəkiliş meydançasında canlı, uşaq kimi, heyrətamiz və dostluq atmosferi yaradan Çak Rassel ilə işləmək mənim üçün şərəf idi".

Kerrinin sözlərinə görə, bütün aktyor heyəti və çəkiliş qrupu Rasselin oynaq əhvalı və ruhundan təsirlənib, ilhamlanıb.

"Maska" filmini karyeramın ən qiymətli daşlarından biri hesab edirəm. Təşəkkür edirəm, Çak", - aktyor deyib.

Xatırladaq ki, ABŞ-lı rejissor, ssenarist və prodüser Çak Rassel dünən 74 yaşında vəfat edib.

Kinematoqrafçının ölüm səbəbi hələlik məlum deyil. Qeyd edək ki, rejissor 1952-ci il mayın 9-da ABŞ-nin İllinoys ştatında anadan olub. Rassel rejissorluq karyerasına 80-ci illərin sonlarında "Qarağac küçəsində qarabasma 3: Yuxu döyüşçüləri" və "Damla" qorxu filmləri ilə başlayıb. Cim Kerrinin baş rolda oynadığı və "Oskar" mükafatına namizəd olan "Maska" (1994) komediyası isə ona dünya şöhrəti qazandırıb.

Müəllif: Tural