"Ahbap" xeyriyyə fondu ləğv edilir - Qəyyum təyin edildi

İstanbul məhkəməsi fırıldaqçılıq və çirkli pulların yuyulması ilə bağlı prokurorluğun açdığı iş çərçivəsində “Ahbap” dərnəyinin bütün əmlakının idarəetmə səlahiyyətini qəyyuma həvalə edib.

Publika.az Türkiyə mediasına istinadən xəbər verir ki, dərnəyə məxsus daşınmaz əmlakların, nəqliyyat vasitələrinin, bank hesablarındakı nağd vəsaitlərin və digər mülkiyyət dəyərlərinin idarə olunması məqsədilə 3 nəfər qəyyum təyin edilib.

Artıq fondun ləğvi prosesinə başlanılıb.

Qeyd edək ki, istintaq orqanları "Ahbap" fondunun rəhbərliyini toplanmış vəsaitləri şəxsi hesablara köçürməkdə və aktivlər almaqda şübhəli bilir. Aralarında fondun təsisçisi, rok musiqiçisi Haluk Levent və bloqer Oğuzhan Uğurun da olduğu təxminən 30 şübhəli həbs edilib. İddialara əsasən, H.Levent 2020-2026-cı illər ərzində ümumilikdə 990 milyon türk lirəsi (təxminən 36 milyon manat) məbləğində qumar oynayıb, 390 milyon lirə (təxminən 14 milyon manat) itirib.

İstintaq çərçivəsində ölkənin bir çox tanınmış şou-biznes və media nümayəndəsi ifadə vermək üçün prokurorluğa çağırılır. Onlar arasında Elçin Sangu, Mahsun Kırmızıgül, Gülben Ergen, Hayko Cepkin və Uğur Dündar da var.