Tupak Şakurun qətlinin sirri 30 il sonra açılır - Məhkəmə başladı

ABŞ-nin Nevada ştatında məşhur amerikalı repçi Tupak Şakurun qətlini təşkil etməkdə ittiham olunan, “South Side Compton Crips” bandasının keçmiş lideri Dueyn Kit Devisin məhkəməsində ilk iclas keçirilib. Bu barədə “ABC News” məlumat yayıb.

Publika.az xəbər verir ki, məhkəmədə ittiham tərəfi Devisin birbaşa atəş açan şəxs olmadığını, lakin qardaşı oğlunun döyülməsinə görə qisas məqsədilə Tupaka qarşı silahlı hücumun təşkilində iştirak etdiyini bildirib. Devis isə ona qarşı irəli sürülən ittihamı qəbul etmir.

Məhkəmə prosesinin təxminən bir ay davam edəcəyi gözlənilir. Təqsiri sübuta yetiriləcəyi təqdirdə, 63 yaşlı Devis ömürlük həbs cəzası ilə üzləşə bilər.

Xatırladaq ki, 2023-cü ildə hüquq-mühafizə orqanları Devisin evində axtarış aparıb. Əməliyyat zamanı bir neçə kompüter, fotoşəkillərlə dolu qutular və Tupak Şakurla bağlı müxtəlif materiallar götürülüb. Devis həmin ilin sonunda saxlanılıb.

Həbsindən sonra keçmiş banda lideri Tupak Şakurun qətlinin sifarişçisinin prodüser və P. Diddy kimi tanınan Şon Kombs olduğunu iddia edib.

Hadisə 1996-cı il sentyabrın 7-də Las-Veqasda baş verib. Naməlum şəxslər Tupak Şakurun içində olduğu avtomobilə atəş açıblar. 25 yaşlı repçi aldığı güllə yaralarından sentyabrın 13-də dünyasını dəyişib.