Madonnanın “Qlastonberi” arzusu suya düşdü - 68 yaşlı ulduza gözlənilməz cavab

"Popun Kraliçəsi" kimi tanınmış dünyaca məşhur amerikalı müğənni Madonnanın 2027-ci ildə Böyük Britaniyanın məşhur “Qlastonberi” festivalında çıxış edəcəyi ilə bağlı yayılan xəbərlər rəsmən təkzib olunub.

Publika.az xəbər verir ki, festivalın təşkilatçısı Emili İvis BBC-nin efirində Madonnanın 2027-ci ilin yayında festivalın əsas ulduzlarından biri olmayacağını açıqlayıb.

“Xeyr, bu, dəqiq Madonna deyil”, - deyə İvis bildirib. O, eyni zamanda gələn ilin iyununda festivalın üç əsas iştirakçısının artıq müəyyənləşdiyini, lakin onların adlarının hələ açıqlanmayacağını söyləyib.

Madonnanın “Qlastonberi”də çıxış edəcəyi ilə bağlı şayiələr onun bu ilin aprelində “Coachella” festivalında Sabrina Karpenter ilə səhnəyə çıxmasından sonra güclənmişdi. Müğənninin gələn il Britaniyada “daha böyük” layihə hazırladığına dair açıqlaması da bu ehtimalları artırmışdı. Lakin festival təşkilatçıları şayiələrə ehtiyatla yanaşmağa çağırıb və “Qlastonberi” ilə bağlı yayılan məlumatların böyük əksəriyyətinin həqiqətə uyğun olmadığını bildiriblər.

Madonna üçün isə bu xəbər uğurlu musiqi dövründə gəlib. Onun Kayli Minouqla birgə ifa etdiyi “Love Sensation” mahnısı Britaniya hit-paradında 8-ci pillədən başlayıb. Bu, sənətçinin son 17 ildə Böyük Britaniyada ən uğurlu sinqlı olub.

Beləliklə, Madonna hələ də “Qlastonberi” səhnəsində çıxış etməyib. Buna baxmayaraq, onun Britaniya musiqi çartlarındakı uğuru davam edir.

Adəm