90-cı illərin məşhur supermodeli indi necə görünür? - FOTOLAR

1990-cı illərin ən məşhur supermodellərindən biri olan Klaudiya Şiffer 56 yaşını qeyd edib.

Publika.az xəbər verir ki, almaniyalı model ad günü münasibətilə sosial şəbəkə hesabında yeni fotolarını paylaşıb.

Şiffer fotolarda narıncı bikinidə hovuzda kamera qarşısına keçib. O, görünüşünü ağ çərçivəli eynək və ürək formalı qızılı boyunbağı ilə tamamlayıb.

Supermodel paylaşımına “Günəş ətrafında daha bir il üçün minnətdaram” sözlərini yazıb. Fotolarda onun illər keçməsinə baxmayaraq, formada qaldığı diqqət çəkib.

Qeyd edək ki, Klaudiya Şiffer 1990-cı illərdə dünyanın ən tanınmış modellərindən birinə çevrilib. O, xüsusilə “Chanel” moda evi ilə əməkdaşlığı və Fransız moda dizayneri, fotoqraf və "Chanel" və "Fendi" kimi qlobal moda evlərinin əfsanəvi rəssamı Karl Lagerfeldin ilham mənbələrindən biri olması ilə məşhurlaşıb. Şiffer karyerası ərzində çoxsaylı nüfuzlu moda jurnallarının üz qabığında yer alıb.

Model 2002-ci ildə britaniyalı kinorejissor və prodüser Metyu Vonla ailə qurub. Cütlüyün üç övladı var.

Şiffer yaşlanmaqla bağlı daha əvvəl verdiyi müsahibələrdən birində bildirib ki, yaşın artmasını təbii qəbul edir və özünü daha gənc göstərməyə çalışmır. Onun sözlərinə görə, insan xoşbəxt və sağlamdırsa, qalan məsələlər ikinci dərəcəlidir.

Müəllif: Adəm