Azərbaycanlı blogerin də qatıldığı türkiyəli fenomenin toyunda bəy saxlanıldı - VİDEO

Sosial mediada "Vanlı Kara Haydar" ləqəbli Mehmet Fatih Tançalan gecə saatlarında keçirilən əməliyyat zamanı saxlanılıb.

Publika.az xəbər verir ki, bir neçə gün əvvəl sosial media fenomeni Çağla Öz ilə evlənən Mehmetin Van şəhərində keçirilən toyundan görüntülər sosial şəbəkələrdə geniş müzakirələrə səbəb olub.

Bununla əlaqədar Van Respublika Prokurorluğu Mehmet barəsində araşdırma başladıb.

Barəsində 25 hadisə ilə bağlı araşdırma aparılan Mehmet bu gün saat 03:00 radələrində Muradiyə rayonundakı evində polis əməkdaşları tərəfindən nəzarətə götürülüb. O, istintaq tədbirlərinin davam etdirilməsi üçün Van İl Polis İdarəsinin Asayiş Şöbəsinə aparılıb.

Bundan əlavə, Mehmetin sosial mediada yayılan görüntüləri, eləcə də toyda ona taxıldığı bildirilən külli miqdarda qızıl-zinət əşyaları ilə bağlı da araşdırma başladılıb. Qızılların və digər əmlakın mənbəyinin müəyyənləşdirilməsi məqsədilə maliyyə araşdırması aparılır. Hüquq-mühafizə orqanlarının tələbi ilə Türkiyənin Maliyyə Cinayətlərinin Araşdırılması Şurasından (MASAK) da araşdırma aparılması istənilib.

Şübhəlinin polis şöbəsindəki prosedurlarının davam etdiyi, proses başa çatdıqdan sonra Van Respublika Prokurorluğuna göndəriləcəyi gözlənilir.

Qeyd edək ki, toya azərbaycanda "baylarsoy" adı ilə tanınan bloger Arifə Məmmədova, həyat yoldaşı, bloger Fidan Zeyn də qatılıb. (Axşam.az)