Dünyanın ən bahalı evləri: Yüzlərlə yataq otağı, helikopter meydançası, dondurma salonu...

Dünyanın ən zəngin insanları dəbdəbəli və prestijli iqamətgahlarda yaşayırlar. Həyat tərzlərindən qaynaqlanan bu reallığa öz aralarında rəqabət də əlavə olunduqda, evlərinin qiymətləri günü-gündən bahalaşır.

Publika.az dünyanın ən bahalı 4 evini təqdim edir:

1. Bukingem Sarayı, Böyük Britaniya

Bukingem Sarayı yaxın vaxtlarda satışa çıxarılmaya bilər, lakin əgər belə olsaydı, onun dəyəri təxminən 4,9 milyard dollar olardı və dünyanın ən bahalı evi statusunu alardı. 240 yataq otağı, 188 işçi otağı və 52 kral və qonaq yataq otağı, habelə üzgüçülük hovuzu və həkim müayinəxanası ilə Britaniya Kral Ailəsinin evidir və bələdçili turlar üçün ictimaiyyətə açıqdır.

Ümumilikdə bu zəngin evdə 775 otaq, o cümlədən 19 kabinet, 92 ofis və 78 vanna otağı var. Bundan əlavə, böyük bir işçi heyəti və gözəl bağları mövcuddur. Şayiələrə görə, bu nəhəng dəbdəbəli malikanədə bir neçə başqa gizli otaqlar var. Təxminən 7 min 150 kvadratmetr ərazini əhatə edən Bukingem Sarayı həm də dünyanın ən böyük evlərindən biridir.

2. Antilia, Hindistan

Dünyanın ən bahalı şəxsi iqamətgahı olan Antilia Hindistanın ən zəngin adamı Mukeş Ambaniyə məxsusdur və adı Atlantik okeanındakı mifik adanın şərəfinə verilib. 37 min 161 min kvadrat metrlik bina Hindistanın ən prestijli istiqamətində yerləşir və 27 mərtəbəyə çatır. Lakin binanın hündürlüyünə baxmayaraq, nəhəng zəlzələlərə tab gətirmək üçün nəzərdə tutulub.

Bu gözəl Mumbay iqamətgahı ənənəvi, təbii elementlər ətrafında dizayn edilib. Zəngin hind ailəsinin bahalı avtomobilləri üçün 6 mərtəbə ayrılıb. Burada həmçinin böyük bir məbəd, bir sıra dəbdəbəli qonaq otaqları, üç helikopter meydançası, qapalı hovuzları olan spalar, bal zalı və yoqa studiyası, dondurma salonu və hamının əylənməsi üçün özəl kinoteatr var. Hətta Hindistanın yüksək temperaturundan qurtulmaq üçün qar yağan xüsusi bir otaq da var. Evin qiyməti təxminən 2 milyard dollardır.

3. Villa Leopolda, Fransa

Avropanın ən bahalı şəxsi iqamətgahı olan Villa Leopolda dünyanın ən prestijli iki yerində yerləşir: Monako və Nitsa. Saray ilk olaraq Belçika Kralı II Leopolda məxsus idi. Elə adını da buradan alır. Malikanə o vaxtdan bəri, bir çox elit sahiblərin əlindən keçib.

Hətta Alfred Hiçkokun "Oğrunu tutmaq" filmi də burada çəkilib. Dəbdəbəli evin nəhəng hovuzu və geniş bağları gündəlik 50-dən çox bağbanın işini tələb edir. Bütün lüks əmlakın ümumi sahəsi 7 min 432 kvadratmetrdir. Evin qiyməti 530 milyon dollardır.

4. Villa Les Cedres, Fransa

Təxminən 1830-cu ildə tikilmiş 1672 kvadrat metrlik Villa Les Cèdres (ətrafdakı çoxlu Sidr ağaclarının şərəfinə belə adlandırılıb) sadə bir evdən daha çox dəbdəbəli saraydır. Fransanın cənubundakı Saint-Jean-Cap-Ferratda 35 hektar ərazidə yerləşən bu tarixi dəbdəbəli malikanə bir vaxtlar Belçika kralı II Leopoldun mülkiyyətində olub.

Malikanə 2016-cı ildə İtaliyanın "Campari" qrupu tərəfindən alınıb və 2019-cu ildə ukraynalı milyarder və iş adamı Rinat Ahmedova satılıb. Xeyli yataq otaqları və kommunal məkanlarla yanaşı, bu dəbdəbəli malikanədə olimpiya ölçülü üzgüçülük hovuzu, heyrətamiz bal zalı və hətta 30 at üçün nəzərdə tutulmuş tövlə də var. Həyətində dünyanın hər yerindən 15 min bitki və tropik çiçəklərlə zəngin 20 istixana tapamaq mümkündür. Malikanə Aralıq dənizinə baxır və palma ağacları ilə örtülmüş çoxsaylı eyvanlara malikdir. Evin qiyməti 350 milyon dollardır.

Nəzrin