Özü öz yarasını müalicə edən oranqutan - İLK MÜŞAHİDƏ

Almaniyanın “Maks Plank” Heyvan Davranışı İnstitutu və İndoneziyadakı “Universitas Nasional” alimləri ilk dəfə bir oranqutanın yarasını sağaltmaq üçün dərman bitkisindən istifadə etdiyini qeyd ediblər.

Publika.az xəbər verir ki, “Maks Plank” Heyvan Davranışı İnstitutunun press-relizinə görə, elm adamları 1994-cü ildən bəri İndoneziyanın Cənubi Açe bölgəsindəki “Gunung Leuser” Milli Parkında müşahidə aparıblar. Onlar Rakus adlı bir “Sumatra” oranqutanının Cənubi Asiyada insanlar tərəfindən ağrı və iltihab əleyhinə müalicə üçün istifadə edilən yarpaqları yığıb çeynədiyini müşahidə ediblər.

Tədqiqatçılar Rakusun sağ yanağındakı yaraya barmaqları ilə bitki ekstraktları sürtdüyünü, daha sonra çeynənmiş bitkini sarğı kimi istifadə etdiyini və yaranın sağaldığını müşahidə ediblər. Tədqiqatçılardan biri olan bioloq İzabelle Laumer deyib ki, biz ilk dəfədir ki, vəhşi heyvanın çox güclü dərman bitkisini birbaşa yarasına tətbiq etdiyini müşahidə edirik.

Araşdırma “Scientific Reports” jurnalında dərc olunub.

Roza Şəfiyeva