2000 il əvvəl  yer üzündən silinən şəhər sakinlərinin qalıqları tapıldı

Arxeoloqlar təxminən 2000 il əvvəl Vezuvi dağının vulkanik axınının Pompey şəhərini yer üzündən sildiyi zaman ölən qadın və kişinin qalıqlarını aşkar ediblər.

Publika.az xəbər verir ki, iki qurbanın bu yaxınlarda tapılmasının təfərrüatları “Scavi di Pompei” elektron jurnalında dərc olunub.

Tapıntılar qədim Roma şəhərindən qaçmağa çalışan insanların həyatının son anları haqqında məlumat verir.

Arxeoloqlar 2023-cü ildə qazıntılara başladıqları evdə skelet qalıqları aşkar ediblər. Nisbətən kiçik ərazi olmasına baxmayaraq, qazıntılar mürəkkəb olub.

Qadının skeleti çarpayının yanında qızıl, gümüş və bürünc sikkələr və mirvarili bir cüt qızıl sırğa da daxil olmaqla bir ovuc xəzinə ilə birlikdə tapılıb. Sümüklərin və dişlərinin analizinə əsasən, o, öləndə təxminən 35-45 yaşlarında olub. Ölən zaman 15-20 yaş arasında olan gənc oğlan dağılan divar tərəfindən əzilib və otağın başqa küncündə çox dar yerdə sıxışıb qalıb.

Elm adamları eramızın 79-cu ilində vulkan püskürməsi zamanı şəhərdə 10.000 ilə 20.000 arasında insanın yaşadığını və təmasdan sonra 20 dəqiqə ərzində piroklastik axın - isti vulkanik qaz, lava və kül nəticəsində təxminən 2000 insanın öldüyünü təxmin edirlər.

Cəmilə