İnanılmaz kəşf: Okeanlarda plastik yeyə bilən göbələklər var

Okeanlarda plastik yeyə bilən göbələklər tapılıb.

Publika.az xəbər verir ki, Havay Universitetinin tədqiqatçıları bəzi su göbələklərinin plastik “yeyə” biləcəyini müəyyən ediblər.

Araşdırmanın nəticələri "Mycologia" jurnalında dərc olunub.

Alimlər bildiriblər ki, plastik tullantılar qlobal ekoloji problemlərdən biridir. Problem okeanlar üçün xüsusilə aktualdır: hər il 625 000 zibil maşınına ekvivalent plastik atılır. Plastik tamamilə parçalanmır, mikroplastikaya çevrilir, toksinləri toplayır və dəniz həyatına zərər verir.

Məhz buna görə də, alimlər ağac parçalamaq qabiliyyəti ilə tanınan dəniz mikroorqanizmlərinin 68 növünü tədqiq ediblər. Havay Universitetindən olan bir qrup alim sənaye və tibbdə geniş istifadə olunan poliuretan plastiklə sınaq aparıb. Tədqiqatçılar hansı göbələklərin bu plastiki daha sürətli emal edə biləcəyini müşahidə ediblər. Ən aktiv 42 növə getdikcə artan miqdarda plastik verilib. Onların zamanla plastiki parçalama prosesini sürətləndirdikləri anlaşılıb.

Nəticələr alimləri olduqca təəccübləndirib. Belə ki, tədqiq edilən göbələklərin 60%-i plastiki uğurla emal edib. Bəzi növlər bu bacarığı cəmi üç ay ərzində 15% təkmilləşdirə biliblər.

Ləman