Ginnesin Rekordlar Muzeyindən REPORTAJ: Nələr var? - FOTOLAR

Kopenhagenin turistik məkanında - Yeni Kral Meydanının yaxınlığında planetin ən qeyri-adi muzeyi yerləşir: Ginnesin Dünya Rekordları Muzeyi. Bu, Avropada dünyanın hər yerindən insanların inanılmaz nailiyyətlərini təqdim edən yeganə interaktiv muzeydir. “Çətin ki, bir yerdə bu qədər fərqli maraqlar tapa biləsiniz. Buna görə də anı qiymətləndirməyə dəyər. Belə bir muzey həm uşaqlar, həm də böyüklər üçün maraqlıdır”, - deyə muzeyin girişində ziyarətçilərə bildirilir.

11 zalda 500-dən artıq rekord

Muzeyin yaradıcısı karikaturaçı Leroy Ripli dünyanın hər yerindən insanların 500-ə yaxın inanılmaz rekordunu bir yerdə toplamağa müvəffəq olub. O, planeti gəzərkən uzun müddət ərzində topladığı inanılmaz eksponatlar kolleksiyası sayəsində bütün dünyada məşhurlaşıb. Muzeyin eksponatları 1000 kvadratmetrdən çox sahəsi olan ikimərtəbəli binada nümayiş olunur. Bütün eksponatlar məşhur Ginnesin Rekordlar Kitabı ilə bağlıdır. Ekspozisiya 11 zalda yerləşir.

Muzeyin yaranması haqında məlumatlar maraq doğurur. “Hər şey 1955-ci ildə Ross və Norris McWhirter tərəfindən Ginnesin Rekordlar Kitabının ilk nəşri ilə başladı”, - deyə muzeyin əməkdaşı məlumat verir: “Kitab təkcə birinci ildə 187 000 nüsxə satılıb. Zaman keçdikcə dünyanın hər yerindən insanlar kimin daha güclü, daha uzun, daha qısa, daha kök, daha uca olması ilə bağlı yarışmağa başladılar. Onlar bu dünyaca məşhur nəşrin səhifələrinə düşməyə çalışırdılar. Bu gün qonaqlar bu heyrətamiz rekordlar haqqında nəinki oxuya, həm də bu nailiyyətləri nümayiş etdirən eksponatlara toxuna, onları vizual izləyə bilərlər”.

Heyrətamiz rekordlar

Karikaturaçı dünya rekordlarının kolleksiyasını yaratmaq üçün çox çalışıb: “Bunların arasında görkəmli, möhtəşəm, gülməli və qəribə nailiyyətlər var”, - deyə muzeyin əməkdaşı məlumat verir: “Muzeydə təqdim olunan bütün eksponatlar ən yüksək və ən aşağı, ən uzun və ən qısa nailiyyətləri təmsil edir. Məsələn, ən uzun və ən kök insanı təsvir edən mum fiqurlar var”.
Bəzi rekordlar - elm, idman, incəsənət, bağçılıq və digər sahələrdə ən görkəmli nailiyyətlərdən bəhs edən fotoşəkillər və videolar şəklində təqdim olunur.

Rekordlar Muzeyində həqiqətən ən qeyri-adi, bənzərsiz rekordları izləmək olur. Məsələn, düz girişdə ziyarətçiləri planetin ən hündür adamı Robert Uodlounun 2 metr 72 sm boyu olan mum fiquru qarşılayır.

Digər eksponat dünyada təsdiqlənmiş ən ağır çəkiyə malik Robert Erl Hughesin mum fiqurudur. O, 485 kq çəkiyə malik olub. Mum fiqurlar real ölçüdə təqdim olunur.

Muzeydə təqdim olunan üçüncü rekordçu həyatında velosipedlər “yemiş” adamdır. 1950-ci ildə Qrenoblda anadan olan Mişel Lotito adlı bu kişi metal və şüşə yeyir. 1966-cı ildən 18 velosiped, iki çarpayı, bir tabut, 15 supermarket arabası, yeddi televizor, altı çilçıraq, bir aşağı kalorili yüngül “Cessna” təyyarəsi və kompüter - cəmi səkkiz ton metal yeyib. O, heç vaxt həzm sistemindən şikayət etməyib.

Uzunluğu üç metrdən çox olan ən uzun bığ, doqquz metr uzunluğunda qadın dırnaqları və s. rekordlar ekspozisiyalarda təqdim olunur.

Muzeyə gələnlər ən çox hündürlüyə tullanmanın səviyyəsini aydın qiymətləndirə bilərlər - 2 m 45 sm.

1955-ci ildə İtaliyada bir qadın çəkisi 10 kiloqramdan çox olan yeni körpə dünyaya gətirib. Uşağın fiqurunun yanında vizual müqayisə üçün adi körpənin başqa bir mum heykəli var.

Eksponatlar arasında 20 məktəblinin yerləşdiyi telefon köşkü və planetin hər yerindən toplanmış bir çox digər inanılmaz və heyrətamiz rekordlar böyük maraq doğurur.

Bir saat ərzində 1049 kərpic

Muzeyin kino zalında məşhur rekordçuların hazırlığından bəhs edən sənədli filmlərə baxmaq olur. Otaqlarda mistisizmə, kabuslara həsr olunmuş zal, həmçinin oturmağa icazə verilən elektrik stul da var. Pop kralı Maykl Cekson və Merilin Monronun mum fiqurları da muzeydə nümayiş olunur.

Muzeydə texnologiya sahəsində ən məşhur qeydlər nümayiş etdirilir. Yer üzündə yetişdirilən ən böyük tərəvəz və meyvələrin modelləri olan rəf də maraq doğurur. Hər birində məhsulun çəkisi, ölçüsü və ili haqqında məlumat olan etiket yer alıb.
Köhnə qatar atmosferinin yenidən qurulması da xoşagələndir. Kupenin əşyaları dəmir yolu səyahətində bəzi nailiyyətləri simvolizə edir.

Otaqların birində yerli bir fəhlənin obrazı var. Dane Hansen adlı fəhlə bir saat ərzində 1049 kərpic qoya bilib. Onun yanında hörülmüş divar var. Bu, onun cəmi 60 dəqiqə ərzində nə qədər inşa etdiyini daha aydın göstərir.

Məhəmməd Əlinin əlcəkləri

İdman qalereyası bölümündə rekorda imza atan idmançılar arasında əfsanəvi boksçu Məhəmməd Əlinin qırmızı dəri əlcəyi də yer alıb. Amma bu əlcəyin əfsanəvi boksçuya məxsus olub-olmaması hələ də müzakirə mövzusudur. Bəzi mənbələrə görə, boks əfsanəsinin döyüş əlcəyi Vaşinqton Milli Tarix Muzeyinə hədiyyə olunub. Ginnesin Rekordlar Muzeyində sərgilənən isə həmin əlcəyin surətidir. Ziyarətçilər boksçunun döyüş səhnələrini və rekordlarını monitorda izləyə bilirlər.

Kainatın mistik sirləri

Otaqlarda texnologiyanın möcüzələri də adamı heyran edir. Ekspozisiyada interaktiv “Mystic Exploratorie“ sərgisi “kainatın mistik sirlərini kəşf etməyə” həsr olunub. Burada ziyarətçi öz kölgəsini tuta, qarşısındakı insanla başını dəyişdirə, dibsiz quyuda əks-sədaya qulaq asa və elektrik stulda otura bilər. Həqiqi elektrik enerjisini özlərindən keçirtmək istəyənlər üçün burada bir cazibə var.

Ginnesin Dünya Rekordlar Muzeyi müasir attraksionları ilə uşaqlı ailələr üçün də maraqlıdır. ("Kaspi" qəzeti)