ABŞ ordusu niyə əfsanəvi "Qara quş"dan imtina etdi? - Maraqlı FAKT

ABŞ Hərbi Hava Qüvvələri hələ də dünyanın ən sürətli təyyarəsi hesab edilən əfsanəvi "SR-71 Blackbird" kəşfiyyat təyyarəsini fəaliyytdən kənarda saxlayıb.

Publika.az xəbər verir ki, "The National Interest" məsələyə aydınlıq gətirib.

Nəşr qeyd edir ki, bu unikal təyyarənin hava qüvvələrindən kənarlaşdırılması hərbi büdcənin kəsilməsi və kəşfiyyat platformasının texnoloji cəhətdən köhnəlməsi nəticəsində baş verib.

1960-cı illərdə hazırlanmış "SR-71" öz dövrünün mühəndislik dahisinin simvoluna çevrildi. Sürəti saatda 3500 kilometri, hündürlüyü isə 25 kilometri keçə bilən bu döyüş təyyarəsi hava hücumundan müdafiə sistemləri tərəfindən aşkar edilmədən düşmən ərazisinin dərinliklərinə nüfuz edə bilirdi. Bununla belə, 1980-ci illərdə ABŞ ekipajı riskə atmadan strateji məlumat toplamağa imkan verən peyk kəşfiyyat sistemləri əldə etmişdi.

Bildirilir ki, "SR-71"in istismarı çox baha başa gəlib. Hər "Blackbird" ("Qara quş") missiyası kompleks hazırlıq və texniki xidmət tələb edirdi.

Qeyd olunur ki, yüksək qiyməti ilə yanaşı, təyyarə texnoloji cəhətdən köhnəlmişdi. Onun kəşfiyyat avadanlığı analoq olaraq qaldı. Bu isə real vaxtda kəşfiyyata ehtiyac duyulduğu bir dövrdə məlumat əldə etmə prosesini zəiflətdi.

Xatırladaq ki, yüksək əməliyyat xərcləri, praktiki dəyərin azalması və kosmik kəşfiyyatın sürətli inkişafı məlum qərarın verilməsinə səbəb oldu. 1998-ci ildə ABŞ Hərbi Hava Qüvvələri "SR-71 Blackbird"dən imtina etdi.

Adəm