Dünya bunu müzakirə edir: Ölmüş anasına nağıl danışdırdı

İngiltərə mediası, ölən sevdiklərinizi 3D süni intellekt avatarları ilə “geri gətirən” mübahisəli bir tətbiqi gündəmə gətirib. Tətbiq, istifadəçilərə vəfat etmiş yaxınları ilə öləndən sonra da ünsiyyət qurmağa imkan verir.

Publika.az xəbər verir ki, tətbiq keçmiş aktyor Kalum Uorsi tərəfindən hazırlanıb.

Bu tətbiq istifadəçilərin sevdiklərinə aid foto və videoları yükləyərək onların görünüş və şəxsiyyətini təkrar edən 3D avatarlar yaradır.

Tətbiqin tanıtım filmində bir qadın, ölən anasının foto və videolarını sistemə yükləyir, onunla danışır və hamiləliyi boyunca məsləhətlər alır. Hətta körpə doğulduqdan sonra mərhumun avatarı ona nağılllar danışır.

Uorsi tətbiqi “insanlığın yaşayan arxivini ölümsüzləşdirir” deyə müdafiə etsə də, sosial mediada sərt tənqidlər gəlib. İstifadəçilər tətbiqi “şeytani, saxta və insanlığı heçə sayan” adlandırıb. Bəzi istifadəçilər isə ödəniş etməsələr, ölmüş valideynləri ilə danışa bilmədiklərini bildiriblər.

Tətbiqin konsepti İngiltərə serialı “Black Mirror”un “Be Right Back” bölümünü xatırladıb. Serialda yas tutan bir qadın, ölmüş sevgilisinin süni intellekt tərəfindən canlandırılmış versiyası ilə əlaqə saxlayırdı.

Roza