Türkiyədə 3 min il yaşı olan bənzərsiz çörəyin resepti tapıldı: Necə bişirilir?

Türkiyənin Batman Universitetinin Hasankeyf Peşə Məktəbinin mütəxəssisləri 3000 il əvvələ aid bal-arpa çörəyinin ən qədim reseptlərindən birini yenidən qurublar.

Publika.az xəbər verir ki, “Phys.org” araşdırmanın nəticələri barədə məlumat yayıb.

Elm adamları Mesopotamiyadan olan mixi lövhələrə istinad edirdilər ki, bunlarda iqtisadi qeydlər, ritual təsvirlər və Hammurabi dövrünə aid çörək standartları haqqında məlumatlar var.

Qədim mətnlərdə müxtəlif çörək növləri xatırlanır: işçilərə gündəlik yeməklərinin bir hissəsi kimi verilən çörəklər və məbədlərdə istifadə olunan böyük bal çörəyi. Mənbələrin təhlili belə çörəyin reseptlərinin təkcə Mesopotamiyada deyil, həm də Qədim Yunanıstan və Romada məlum olduğunu üzə çıxarıb, onun geniş yayılmasını və mədəni əhəmiyyətini vurğulayır.

Tarixi məlumatları öyrəndikdən sonra komanda araşdırmaya başlayıb. Tədqiqatçılar Tunc və Dəmir dövrlərinə aid sadə və asanlıqla əldə edilə bilən inqrediyentlərdən – arpa unu, su, bal və dəniz duzundan istifadə ediblər. Bir sıra sınaqlardan sonra istədikləri xəmir konsistensiyasına nail olublar və qədim çörəkçilərin etdiyi kimi çörəyi qaynar daşlarda bişiriblər.

Layihənin yaradıcılarının fikrincə, yeməyin yenidən yaradılması qədim mesopotamiyalıların gündəlik həyatını daha yaxşı başa düşməyə kömək edir. Batman Universitetinin rektoru İdris Dəmir hesab edir ki, yenidən qurulan resept regionun mədəni irsinin qorunması üçün vacibdir və turizm və təhsil proqramlarında istifadə edilə bilər. Universitet ictimaiyyəti keçmişin kulinariya ənənələri ilə tanış etmək üçün festival və tədbirlərdə qədim çörəyi nümayiş etdirməyi planlaşdırır.

Tural