Maraq dünyası

22 yaşlı oğlan xəstəxanalıq oldu: o qədər yeyib ki...

6 Dekabr 2025 06:46

Britaniyanın Devon qraflığında 22 yaşlı oğlan "fast food" yarışmasından sonra xəstəxanaya yerləşdirilib.

Publika.az "Mirror"a istinadən xəbər verir ki, onun iki gün ərzində bir neçə kiloqram ət və balıq, eləcə də 38 porsiya naqet yediyi məlum olub.

O, əvvəlcə restoranda 36 dəqiqə ərzində iki kiloqramlıq bifşteks, kartof qızartması və soğan halqaları yeyib. Ertəsi gün səhər özünü pis hiss etsə də, həmin axşam yeni bir yarışmada iştirak edərək 2,5 kq balıq və kartof qızartması yeyib.

Daha sonra onun vəziyyəti sürətlə pisləşib - şiddətli qarın ağrısı, qusma və 39°C-yə qədər qızdırma yaranıb. Dostları onu xəstəxanaya aparıblar. Oğlanın mədəsində çoxlu miqdarda həzm olunmamış qida aşkarlanıb.

Tibbi yardım aldıqdan sonra evə buraxılan şəxs elə həmin axşam 38 toyuq naqeti, böyük bir porsiya kartof qızartması və desert yeyib.

O, uğursuz təcrübəsinə baxmayaraq, çətinliklərdən imtina etmək niyyətində olmadığını bildirib.

Ləman