30 il əvvəl çəkiblər, 2025-ci ildə gerçəkləşib – “Simpsonlar”ın dəhşətli proqnozları

Yarandığı gündən bəri, "Simpsonlar" ABŞ prezidenti Donald Trampın prezidentliyindən tutmuş ağıllı saatlara qədər çoxsaylı hadisələri "proqnozlaşdırmaq" baxımından qlobal bir fenomenə çevriliblər.

Publika.az “Milliyyet”ə istinadla xəbər verir ki, “Simpsonlar” 2025-ci il hadisələri ilə bağlı proqnozları ilə yenidən gündəm olublar.

Böyük Britaniyanın “Metro” xəbər agentliyinin məlumatına görə, serialın prodüseri Mett Selman bunun "sehr" deyil, tarixi və riyazi bilik məsələsi olduğunu iddia etsə də, ssenarilərlə reallıq arasındakı üst-üstə düşmə təəccüblüdür.

2025-ci ilin reallığı ilə uyğunlaşan serialın ən diqqət çəkən başlıqlarından bəziləri...

2025-ci ilin ən çox müzakirə olunan hadisələrindən biri olan Keti Perri və Loren Sançez kimi adların iştirak etdiyi, yalnız qadınların olduğu "Blue Origin" kosmik missiyası illər əvvəlki serialın bir bölümünü xatırlatdı.

1994-cü ildə çəkilmiş "Dərin Kosmos Homeri" seriyasında NASA ictimai marağı artırmaq üçün adi bir vətəndaş olan Homer Simpsonu kosmosa göndərdi. Bugünkü "kosmik turizm" və ictimaiyyətlə əlaqələrə əsaslanan qalaktik səyahətlər serialın "hər kəs astronavt ola bilər" vizyonu ilə mükəmməl uyğun gəlir.

1994-cü ildə yayımlanan "Qaşınma və Cızıqlı Torpaq" seriyasında nəzarətdən çıxan və insanlara hücum edən robotlar o dövrdə fantastika hesab olunurdu. Lakin 2025-ci ilə qədər süni intellektin qlobal işçi qüvvəsinə təhdidi, dezinformasiya riski və onun insan qarşılıqlı təsirini əvəz etməsi şounun "nəzarətdən çıxmış texnologiya" mövzusunu müasir reallığa çevirdi.

2009-cu ildə yayımlanan bir epizodda Lisa Simpson qlobal istiləşmənin Sprinqfild şəhərini xəritədən necə siləcəyi barədə ehtiraslı bir çıxış etdi və ona "ekoloji ümidsizlik" diaqnozu qoyuldu. 2025-ci ildə bütün dünyada rekord həddə çatan temperatur və qəfil daşqınların baş verməsi ilə Qreta Tunberq kimi fəalların Lizanın illər əvvəl təsvir etdiyini - indi "iqlim narahatlığı" adlandırdığımız problemi artıq təmsil etdiyi aydındır.

1993-cü ildə çəkilmiş "Marge vs. Monorail" serialının bölümündə dövlət resurslarının düzgün idarə olunmaması və uğursuz investisiyalar nəticəsində yaranan iqtisadi çöküşdən bəhs olunur. Bir çox ölkənin 2025-ci ildə üzləşdiyi borc böhranları, həddindən artıq xərclər və keçmiş administrasiyaların səhvlərinin bədəlini ödəyən mülki şəxslərin acınacaqlı vəziyyəti Sprinqfilddəki uydurma monorail fəlakətinə bənzəyir.

1995-ci ildə Lisa Simpsonun quzunu sığalladıqdan sonra ət yeməkdən imtina etməsi o dövrdə qəribə hesab olunurdu. Bu gün bitki mənşəli pəhrizlər iqlim dəyişikliyi və heyvanların rifahı ilə bağlı müzakirələrin mərkəzindədir. 30 il əvvəl "qəribə" hesab edilən bu seçim 2025-ci ildə dünyada əsas kulinariya ənənəsinə çevrilib.

Serialın aparıcısı Met Selman "People" jurnalına verdiyi açıqlamada sirri açıb:

“Əgər kifayət qədər proqnoz versəniz, onlardan bəzilərinin reallığa uyğun gəlməsi riyazi bir zərurətdir. Bundan əlavə, bəşəriyyətin keçmişdəki axmaqlıqlarını öyrənsəniz, qaçılmaz olaraq onun gələcək axmaqlıqlarını proqnozlaşdırırsınız”.

Tural