Ağcaqanadlar bizdən qisas alırmış: İnsan qanını buna görə "sevirlər"

İnsan fəaliyyəti təbiəti sıxışdırdıqca, ağcaqanadlar qidalanma vərdişlərini dəyişərək insanlara yönəlib.

Publika.az xəbər verir ki, “Frontiers in Ecology and Evolution” jurnalında dərc olunan araşdırmaya əsasən, Rio-de-Janeyro ştatındakı iki qoruqda tutulan ağcaqanadların qan nümunələri DNT analizi ilə araşdırılıb.

Nəticələrə əsasən, 52 növü təmsil edən 1714 ağcaqanaddan 145 dişinin qanla qidalandığı aşkarlanıb. Onlardan 24-nün qəbul etdiyi qan analiz edilib. Məlum olub ki, bu qanın 18-i insana, biri qurbağaya, altısı quşa, biri itə, biri isə siçana məxsusdur.

Tədqiqatçılar ağcaqanadların insan qanına üstünlük verməsinə müxtəlif ekoloji və bioloji amillərin təsir göstərə biləcəyini bildiriblər.

Qeyd olunub ki, Atlantik meşələrinin ağacların qırılması nəticəsində sürətlə kiçilməsi və insanların meşəlik ərazilərə doğru irəliləməsi bir çox bitki və heyvan növünün yox olmasına səbəb olub. Bu proses isə ağcaqanadların vərdişlərini və yaşayış mühitlərini dəyişərək insanlara daha yaxın ərazilərə köçməsinə gətirib çıxarıb.

Adəm