Ermənistanın möhtac qaldığı milyarderlər: Onlar kimdir və haralıdırlar?

2024-cü ilin birinci yarısı üçün Ermənistanın ən böyük vergi ödəyiciləri siyahısında Rusiyada biznesi olan sahibkarların təsis etdiyi şirkətlərin sayı artır.

Publika.az bu barədə "Sputnik Armeniya"ya istinadən xəbər verir.

Adları və sahib olduqları sərvətləri ilə məşhur olan "milyarder qardaşlar" Fartuşnyak Ukraynadan, Aleksandr Çaçava Gürcüstandan, Amaryan qardaşları isə Ermənistandandır.

Onların biznez fəaliyyətindəki rəqəmlərə diqqət edək.

2024-cü ilin birinci yarısı üçün Ermənistanın ən yaxşı 1000 vergi ödəyicisi arasında ilk dəfə olaraq yüksək texnologiya sektorunun böyük investoru Aleksandr Çaçavaya məxsus “MGA Development” şirkəti daxil edilib. O, 2022-ci ilin sentyabrında VK-dan "My.Games" oyun inkişafetdirmə şirkətini 642 milyon dollara alması ilə tanınır. Çaçava təkcə qurulmuş müəssisələri satın almaqla deyil, həm də yeni layihələrə vençur sərmayələri qoymaqla məşğuldur.

2024-cü ilin birinci yarısında onun şirkəti Ermənistan büdcəsinə 220 milyon dram və ya təxminən 565 min dollar ödəyib, Kiprdə qeydiyyatdan keçmiş "My.Games Holdings Ltd" şirkəti Çaçava ilə onun biznesi arasında əlaqə rolunu oynayır.

Şirkətin Ermənistanda ödədiyi vergilərdə gəlir vergiləri üstünlük təşkil edir, ona görə də çox güman ki, onun proqramlaşdırma komandasının bir hissəsi burada yerləşir.

Əvvəllər Moskvada işləyən David və Vardan Amaryan qardaşlarına məxsus “Balchug Capital” investisiya şirkətinin vergi ödənişləri xeyli artıb. Son illərdə erməni iş adamlarının idarə etdiyi aktivlərin həcmi əhəmiyyətli dərəcədə çoxalıb. Bunun bir səbəbi də şirkətin baş ofisinin hazırda İrəvanda yerləşməsi ola bilər.

Siyahıya Vladimir və Nikolay Fartuşnyak qardaşlarına, habelə Aleksandr Mixalskiyə məxsus "Ostin" şirkəti də daxil edilib. Onlar Rusiyanın “Sportmaster” mağazalar şəbəkəsinin həmtəsisçiləri kimi tanınır, lakin onların başqa aktivləri də var.
Hər üçü aprel ayında "Forbes"in rus milyarderləri siyahısına daxil olub. Vladimir Fartuşnyakın sərvəti 1,8 milyard dollar, Nikolayın 1,5 milyard dollar, Mixalskinin sərvəti 1,3 milyard dollar dəyərində qiymətləndirilir.

Qeyd edək ki, “Sportmaster” əvvəllər Ermənistanın ən böyük vergi ödəyiciləri siyahısında yer alırdısa, indi bu üç iş adamı Ermənistanda dövriyyəsini artırır. Əgər 2023-cü il üçün "Sportmaster" ("Ostin" o zaman siyahıda deyildi) təxminən 437,2 milyon dram (indiki məzənnə ilə təxminən 1,1 milyon dollar) ödəyibsə, 2024-cü ilin birinci yarısı üçün "Ostin"lə birlikdə təxminən 520 milyon dram (təxminən 1,4 milyon dollar) ödəyib.

Bu şirkətlərin yalnız Ermənistan daxilindəki satışdan, yoxsa üçüncü ölkələrə satışdan gəlir əldə etdiklərini söyləmək çətindir.

Adəm Abbaslı