Belarusdan Rusiyaya arxadan zərbə: NATO ilə dialoqa hazırlıq gedir

Belarus Vyana Sənədi çərçivəsində Şimali Atlantika Alyansına (NATO) üzv dövlətlərlə praqmatik dialoqu bərpa etməyə ümid edir.

Publika.az xəbər verir ki, bu barədə Belarus müdafiə nazirinin beynəlxalq hərbi əməkdaşlıq üzrə köməkçisi, general-mayor Valeri Revenko bildirib.

Onun sözlərinə görə, sənəd çərçivəsində dialoqun bərpası silahlı qüvvələrlə, o cümlədən sərhədyanı ərazilərlə bağlı bir sıra aktual məsələlərin həllinə imkan verəcək.

"Ümid edirik ki, Vyana Sənədinin imkanlarının obyektiv qiymətləndirilməsi, regional etimad və təhlükəsizlik tədbirləri Belarus Respublikası ilə həmsərhəd olan dövlətlərə və digər ölkələrə yeganə düzgün qərar qəbul etməyə, praqmatik dialoqa qayıtmağa imkan verəcək", - deyə müdafiə nazirinin köməkçisi qeyd edib.

General-mayor əlavə edib ki, Belarus istər bütövlükdə, istərsə də sərhədyanı ərazilərdə silahlı qüvvələrin fəaliyyəti ilə hər hansı şəkildə bağlı olan bir çox aktual məsələlərin həllini tapacağına əmindir.

Vazeh BƏHRAMOĞLU