Qarabağdan istifadə edib Azərbaycan və Türkiyədən...

"Moskva Türkiyəyə qarşı təkcə "kürd kartı"ndan deyil "erməni kartı"ndan da istifadə edir. Artıq Rusiya və Ermənistan Türkiyəyə qarşı birləşiblər".

Publika.az xəbər verir ki, bu barədə Türkiyənin "Star" qəzeti yazıb.

Qəzet əlavə edir ki, bu ittifaq Dağlıq Qarabağda atəşkəs rejiminin ləğvinin elan olunmasına gətirib çıxardı və müharibə təhlükəsini artırdı.

Qeyd edək ki, Ermənistan Müdafiə Nazirliyi ötən həftə atəşkəs rejiminin ləğv olunduğunu elan edib.

"Ermənistan və Rusiyanın hava hücumundan müdafiə sistemlərini birləşdirmək qərarı Qafqazda vəziyyəti kəskinləşdirir. Dağlıq Qarabağ ətrafında gərginliyin artdığı bir vaxtda Türkiyə-Ermənistan sərhədində yeddi min rus əsgəri yerləşdirildi. Həmçinin, Moskva Ermənistana hərbi helikopterlər göndərdi. Belə görünür ki, Ankara ilə gərginlikdən sonra Rusiya Türkiyə və Azərbaycanın daha da yaxınlaşmasından narahatdır", - deyə qəzet vurğulayıb.

"Star" yazır ki, Qarabağdakı gərginlik birbaşa Rusiya-Türkiyə böhranı ilə bağlıdır: "Güman etmək olar ki, Rusiya Ermənistan vasitəsilə Türkiyə və Azərbaycandan qisas almağa çalışır".

Asif Nərimanlı