İslam Kərimovu zəhərləyiblər – Mərkəzi Asiya üçün SUİ-QƏSD PLANI

Özbəkistan prezidenti İslam Kərimovun xəstəxanaya düşməsinin arxasında sui-qəsd planı var.

Publika.az xəbər verir ki, bu iddia ilə Rusiyanın "vremenynet" saytı çıxış edib.

Sayt yazır ki, hazırda dünyada hansısa qlobal dəyişikliklərin ola biləcəyi atmosferi müşahidə olunur: "Vəziyyət o qədər gərgindir ki, adi bir qığılcımla yanğın başlayacaq. Müharibələr uzun müddət ərzində yetişir. Misal üçün, Avstriya-Macarıstan taxt-tacının vəliəhdi Serbiyada öldürüləndən sonra başlanan I Dünya müharibəsi əslində, çoxdan yetişmişdi. İslam Kərimovun xəstəxanaya düşməsi də dolayısı ilə bu mənzərəni yaradır. Bir neçə gün əvvəl onun ölümü haqda xəbər yayıldı. Rəsmi məlumatda bu təkzib olundu. Lakin mənbə deyirdi ki, Kərimov olimpiyaçılara verilən ziyafətdə spirtli içkini çox qəbul etdiyi üçün qəfil şüurunu itirib. Həkimlər ona insult diaqnozu qoyublar".

Məqalədə bildirilir ki, İslam Kərimovun xəstələnməsi şübhələrə yol açır.

"Çünki İslam Kərimovun yaşı 78 olsa da, adətən Şərqdə hökmdarlar bu yaşda ölmürlər. Məsələ hətta onun yaşının 78 olmasında da deyil. Bu, dövlət rəhbəri üçün kritik yaş həddi deyil. Digər tərəfdən, İslam Kərimovun təkcə Özbəkistanda yox, bütün Mərkəzi Asiyada sabitliyin qorunmasındakı rolunu nəzərə alsaq, o zaman onun sağlamlığı xüsusi diqqətdə olmalı idi. Güman etmək olar ki, əslində belə də olub. O zaman Kərimovun xəstələnməsi təsadüfdürmü? Burada Mərkəzi Asiyanın iki lideri diqqət mərkəzinə düşür. İslam Kərimov və Nursultan Nazarbayev. Onlar hələ SSRİ vaxtında hakimiyyətə gəlmişdilər. Uzunmüddətli hakimiyyət təkcə Şərqin ənənələrindən irəli gəlmir, regionda sabitliyi saxlamaq üçün buna ehtiyac var. Müşahidəçilər də bildirirlər ki, Özbəkistan və Qazaxıstan sabitliyi məhz Kərimov və Nazarbayevin liderliyinə görə əldə edib. Təcrübə bunu təsdiq edir. Qırğızıstanda Əsgər Akayevin gedişindən sonra baş verənlər, yaxud Tacikistanda vətəndaş müharibəsi bunu deməyə əsas verir. Ehtimallara görə, bu, Mərkəzi Asiya ağsaqqallarından istənilən birinin aradan götürülməsi, hər iki respublikada qeyri-sabitliyin başlanması deməkdir. Bu baxımdan, İslam Kərimovun xəstələnməsi və ölümü haqda xəbərlər bomba effekti yaradır. Həmçinin, onun xəstəxanaya düşməsində hər hansı sui-qəsd planı, misal üçün, zəhərlənməsi kimi halların olması ehtimalı var. Çünki dünyanın müxtəlif yerlərində idarəolunan xaos strategiyasını həyata keçirənlər, bununla regionu ciddi şəkildə qarışdıra bilərlər", - deyə məqalədə qeyd olunur.

Asif