Ellada Məmmədli: “Arif Hacılı “mənə biət edin” prinsipini işə salıb”

“Parlament seçkilərində partiyadan namizədliyini irəli sürən şəxslərlə bağlı Təlimat və öhdəlik sənədi ADR-çilərə qarşı qısqanclığın nəticəsidir”.

Bunu Publika.az-a açıqlamasında Müsavat Qadınlar Birliyinin sədri, ADR hərəkatının İdarə Heyətinin üzvü Ellada Məmmədli deyib.

Onun sözlərinə görə, belə təlimat sənədi ADR-dən deputatlığa namizədliyini irəli sürmək istəyənlərə qarşı inzibati mexanizm olaraq istifadə olunacaq: “Burada söhbət Vurğun Əyyubla mənim namizədliyimdən gedir. Bu təlimat absurd bir şeydir. Partiya nizamnamə ilə idarə olunmalıdır. Düzdür, müəyyən boşluqlar olanda onlar təlimata əsaslanır. Neçə illər ərzində deputatlığa namizədliklə bağlı heç bir problem yaşanmayıb. Hər hansı öhdəlik götürən olmayıb. Bloklara qoşulanda da namizədlər verilib, məsələlər həll edilib. Mən bir müsavatçı kimi partiya nizamnaməsi və məramnaməsini qəbul edib Müsavata gəlmişəm. İndi öhdəlik götürməliyəm ki, mütləq tabe olacağam?”

E. Məmmədli əlavə edib ki, başqanın adına ərizə yazmaq heç bir çərçivəyə sığmır: “Müsavat Nizamnaməsinin 5-ci maddəsində deputatlığa namizədliklə bağlı müddəalar əks olunub. 5.4-cü bənddə qeyd edilib ki, Müsavat təşkilatının istənilən rayon təşkilatı və Divan öz təklifini verə bilər. Namizədin Məclisdə təsdiq olunması söhbəti yoxdur. Bu, bilavasitə rayon təşkilatlarının hüquqlarının əlindən alınmasına gətirib çıxarır. Məclisin namizədi təsdiq edib-etməməsi çox gülünc bir şeydir. Demokratik qayda-qanunlara tamamilə ziddidir. Bu, Arif Hacılının tələbidir və “Mənə biət etməyənlər biət etsin” anlamına gəlir. Yəni “məni başqan kimi qəbul etməyənlər ərizə yazmağa məcbur olsunlar” prinsipidir”.

Öhdəliyi qəbul edib-etməyəcəyinə gəlincə, E. Məmmədli onun üçün nizamnamənin hər şeydən daha önəmli olduğunu bildirib.

“Biz nizamnamədən kənara çıxmırıq, belə bir niyyətimiz də yoxdur. Deyilən təlimat partiya üzvü olmayan fərdlərə aid olmalıdır. Mən özüm öhdəlik barədə qərar verə bilmərəm. Çünki namizədliyimi Müsavat Qadınlar Birliyinin Şurası verəcək. Təlimatı müzakirə edəcəyik, müzakirədən sonra hansı nəticəyə gəlsək, onu da bəyan edəcəyik”, - deyə o qeyd edib.

Asif Nərimanlı