ABŞ-ın xüsusi elçisi İrəvanda - Zəngəzur dəhlizinə xüsusi diqqət

Ermənistanın xarici işlər naziri Ararat Mirzoyan ABŞ-ın Sülh Missiyaları üzrə xüsusi nümayəndəsinin baş müşaviri Arye Laytstounu qəbul edib.

Publika.az xəbər verir ki, Xarici İşlər Nazirliyinin mətbuat xidmətindən verilən məlumata görə, görüşdə Trans-Xəzər Sahibkarlıq Fondunun prezidenti Konstantin Sokolov da iştirak edib.

“Görüş zamanı TRIPP proqramının həyata keçirilməsinə xüsusi diqqət yetirilib, hər iki tərəf onun mümkün qədər tez bir zamanda praktiki olaraq həyata keçirilməsində maraqlı olduqlarını vurğulayıblar”, - məlumatda deyilir.

Tərəflər 8 avqust 2025-ci ildə keçirilən Vaşinqton Sülh Zirvəsindən bəri əldə edilən əhəmiyyətli irəliləyiş və nailiyyətləri qeyd ediblər. Regionun inkişaf potensialını maksimum dərəcədə artırmaq üçün Ermənistan və Azərbaycan arasında sülhün bərqərar olmasının vacibliyini vurğulayan həmsöhbətlər, həmçinin sülhün daha da möhkəmləndirilməsinə yönəlmiş mümkün addımları müzakirə ediblər.

Ararat Mirzoyan və Arie Laytstoun həmçinin ticarət və iqtisadi əməkdaşlıq imkanlarını və proqramlarını, eləcə də Ermənistanın iqtisadi və enerji dayanıqlığını gücləndirməyə yönəlmiş qarşılıqlı əlaqələri müzakirə ediblər.

Regional əlaqənin inkişafı və əlaqəli rəqabət üstünlüklərinin reallaşdırılması ilə bağlı məsələlər ətraflı müzakirə edilib. Ermənistanın beynəlxalq nəqliyyat və infrastruktur sistemlərinə ən effektiv inteqrasiyası perspektivləri barədə fikir mübadiləsi aparılıb. Tərəflər qarşılıqlı maraq doğuran digər məsələlərə də toxunublar.

Müəllif: Tural