Azərbaycanla Ermənistan bu əraziləri dəyişdirir? - Mirzoyandan sensasion açıqlama

Ermənistan Azərbaycanla keçmiş anklavların mübadiləsini istisna etmir.

Publika.az xəbər verir ki, bunu Ermənistanın xarici işlər naziri Ararat Mirzoyan ATƏT-in fəaliyyətdə olan sədri və İsveçrənin vitse-prezidenti İqnazio Kassis ilə birgə mətbuat konfransında “Sputnik Ermənistan”ın sualına cavab olaraq bildirib.

Onun sözlərinə görə, keçmiş anklavlar məsələsinin həlli üçün müxtəlif variantlar mövcuddur və tərəflər məsələyə konstruktiv yanaşırlar.

“Heç bir razılaşmanı əvvəlcədən mühakimə etmək istəmirəm, amma deyə bilərəm ki, əgər Ermənistanın beynəlxalq səviyyədə tanınmış 29.743 kvadrat kilometrlik ərazisindən başqa bir dövlətə bir şey köçürüləcəksə və ya bir şey alınacaqsa - yəni ərazi dəyişikliyi olarsa - bu məsələ ümumxalq səsverməsi tələb edir. Və bu belə də olacaq, bundan qaçmaq olmaz”, - Mirzoyan bildirib.

Onun fikrincə, anklavların mübadiləsi mümkün həll yollarından biridir, amma yeganə deyil.

"Yəni nəzəri olaraq mütənasib ərazilər dəyişdirilə bilər. Deyə bilərəm ki, onlar da konstruktiv yanaşma nümayiş etdirirlər. Nəticə necə olacaq? Səsverməyə qoyulacaq", - Mirzoyan bildirib.

Müəllif: Tural