Açıq-saçıq geyinən azərbaycanlı müğənni: “Gözümün qurdunu öldürürəm“

Azərbaycan ulduzları arasında “dəcəlliyi” ilə tanınan və sevilən Səidə Sultan ürəyində qalan gizli məqamların hamısını açıb-tökdü. Müğənni xanım sevib-sevilmək istədiyini etiraf edib. Publika.Az-a müsahibə verən xanım Sultanova bir neçə ay bundan öncə yaşadığı eşq macərasından da söz açıb.

- Səidə xanım, səhnədə olduğunuz müddət ərzində özünüzü tamaşaçıya sevdirə bilmisinizmi?

- O qədər də sevdirə bilməmişəm. Səbr edib, pillə-pillə ucalmalıyam.

- Şou-biznes əhli ilə aranız necədir?

- Hər kəslə aram yaxşıdır. Ancaq mənim bostanıma daş atanda hər kəsin cavabını layiqincə verməyə hazıram. Çox əsəbiyəm. Yəni ki, heç kimin mənimlə işi olmasın.

- Bu zamanadək kiməsə pislik etmisiniz?

- Xeyir, etməmişəm, heç vaxt da etmərəm. Çünki hər birimiz müsəlmanıq. Pislik etməklə nə qazanmaq olar ki? Ancaq ayağımın altını qazan çoxdur.

- Bəs, düşmənləriniz kimlərdir?

- Düşmənim ancaq ermənilərdir. Azərbaycanlıya heç vaxt düşmən gözü ilə baxa bilmərəm.

- Həmkarınız Kərimlə aranız necədir?

- Kərimi çox istəyirəm. O, mənim qardaşımdır. Xanımı da gözəl xanımdır. Ailəvi dostuq.

- "Qardaş" dediyiniz həmkarınızın xanımı sizi qısqanır?

- Xeyr, əsla qısqanmır. Çünki bilir ki, mənim Kərimlə aramda heç nə ola bilməz.

- Əlinizə düşən fürsətlərdən lazımınca istifadə edə bilmisinizmi?

- Əlimə bir neçə dəfə şans düşüb. Sadəcə olaraq istifadə edə bilməmişəm. Səbəbini isə heç özüm də bilmirəm. Ancaq nəyisə etmək istəsəm, bilirəm ki, öhdəsindən gələ bilərəm.

- Bir neçə ay bundan öncə nişanlanacağınız haqda xəbər yayılmışdı. Ancaq nədənsə nişan mərasiminiz baş tutmadı. Xoşbəxtçiliyinizə kim mane oldu?

- Bəli, xəbər doğru idi. Ancaq sözügedən mərasim olmadı. Çünki fikirləşdiyim ailə həyatını o insanda görə bilmədim. Demirəm ki, məndən yoxdu və ya ideal insanam. Hər kəsin səhvi olur. Sadəcə olaraq sonumuz olmayacaqdı. Nə vaxtsa, ya o məni, ya da mən onu öldürəcəkdim. Ona görə də sözügedən münasibətin sona yetməsi məsləhət idi və bitdi.

- Sevgilinizə görə əziyyət çəkib, göz yaşı tökmüsünüz?

- Çətinlik çəkdiyim məqamlar olub. Elə vaxtım olub ki, maddi baxımdan da əziyyətli günlərim olub. Ancaq pula görə heç vaxt kiməsə ağız açmamışam. Sevgi baxımından isə orta məktəbdə oxuyarkən əziyyət çəkmişəm.

- Hazırda həyatınızda sevdiyiniz şəxs var?

- Həyatımda heç kim yoxdur. Çünki ürəyimə yatan oğlan yoxdur. Əslində sevib-sevilmək istərdim. Sevgiyə ehtiyacım var. Mənim evlənəcəyim oğlan sözün əsl mənasında kişi olmalıdır.

- Ailə qurduqdan sonra da açıq-saçıq geyimlərə yenə də üstünlük verəcəksiniz?

- Əgər nişanlım qısa geyimlərə icazə verməsə, heç vaxt geyinmərəm. Hələ cavanam. Gözümün qurdunu öldürürəm (gülür).

- Evləndikdən sonra sənətinizi davam etdirib şou-proqramlara gedəcəksinizmi?

- Əgər evləndiyim şəxs məni maddi baxımdan qane edərsə, işləmərəm. Ancaq evli xanım olduqdan sonra şou proqramlara getməyəcəyəm.


Ceyran Əsgərqızı
Publika.Az