Şeyxin qudası: “Ömrümün sonuna kimi Həccə gedəcəm”

“Ömrümün sonuna kimi müqəddəs Həcc ziyarətinə gedəcəm. Allahdan arzum odur ki, ikinci dəfə Kəbə evinin içərisində olmağı mənə qismət etsin”.

Bu sözləri Publika.az-a açıqlamasında Qafqaz Müsəlmanları İdarəsinin (QMİ) sədri hacı Allahşükür Paşazadənin qudası, Milli Məclisin deputatı Qalib Salahzadə bildirib.

Onun sözlərinə görə, Kəbə evinin içərisində olmaq hər adama qismət olmur: “Peyğəmbər övladlarının hamısı Kəbə evinin içərisində olublar. Allah mənə bunu 1 dəfə qismət etdi. İnşallah, növbəti dəfə də qismət edər”.

Q.Salahzadə deyib ki, Azərbaycan parlamentində indiyədək heç kəs 27 dəfə Həcc ziyarətinə getməyib: “Bundan sonra da olmayacaq. Yeganə deputat mənəm ki, 27 dəfə Həcdə olmuşam”.

Hacı Qalib Salahzadə jurnalistlərin onun barəsində yazdıqlarından qətiyyən incimədiyini söyləyib: “Mən jurnalistlərin hər biri ilə dostam. Gün ərzində mənə 12-13 jurnalist zəng edib müsahibə alır. Mən hər bir jurnalistin xətrini çox istəyirəm”.

Deputatlıqdan sonrakı fəaliyyətinə də toxunan Q.Salahzadə bundan sonra vaxtının çox hissəsini nəvə və nəticələrinə həsr edəcəyini bildirib: “Nəvələrim və nəticəm var. Adam nə qədər deputat olar? Allah mənə ömür versin, nəvə və nəticələrimlə vaxt keçirim”.

Vasif Həsənli