İranda “zombi” oyandı: Hansı təhlükələri var?

İranın cənub-şərqində yerləşən və 710 min ildir sönmüş sayılan “zombi” Taftan vulkanı yenidən aktivləşib.

Publika.az “Daily Mail”ə istinadən xəbər verir ki, nəhəng vulkanın zirvəsi son 10 ayda doqquz santimetr yüksəlib.

“Zombi” anlayışı, sönmüş və ya qeyri-aktiv hesab edilən, lakin zəlzələlər, qaz emissiyaları və səthdəki deformasiyalar kimi “həyat əlamətləri” göstərən vulkanlara aid edilir.

Alimlər Taftanın qəfil oyanmasının səbəbini zirvənin altında isti maye və qazların toplanması, həmçinin maqmanın səthin dərinliklərinə doğru hərəkət etməsi ilə əlaqələndirirlər. Bildirilir ki, 2024-cü ildə bölgədə tüstü və kül emissiyaları da müşahidə olunub.

Vulkanoloq Pablo Qonzalesin sözlərinə görə, yeraltı təzyiq artmaqda davam edir və bu, gələcəkdə zəif və ya güclü enerji buraxılmasına səbəb ola bilər. Hazırda vulkan hər gün təxminən 20 ton kükürd dioksidi, həmçinin hidrogen sulfid, hidrogen flüorid və su buxarı buraxır. Bununla belə, yaxın zamanda püskürmə təhlükəsi müşahidə olunmur.