Rəsmi xronika

Azərbaycan 2027-ci ildə İslam Zirvə Konfransına ev sahibliyi edəcək - Prezident

24 İyun 2026 11:00

Azərbaycan yaxın illərdə İslam dünyasının ən mötəbər sammitinə ev sahibliyi etməyə və İslam Əməkdaşlıq Təşkilatına (İƏT) rəhbərlik etməyə hazırlaşır.

Publika.az xəbər verir ki, bu barədə Azərbaycan Prezidenti İlham Əliyevin İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci Sessiyasının iştirakçılarına ünvanladığı müraciətdə bildirilib.

Dövlət başçısı müraciətində rəsmi Bakının təşkilat çərçivəsindəki gələcək hədəflərini açıqlayıb:

"2027-ci ildə Azərbaycana İslam Zirvə Konfransının 16-cı Sessiyası keçiriləcək və ölkəmiz İƏT-də Sədrliyi öz üzərinə götürəcək. Sədrliyimiz dövründə üzv dövlətlərin ümumi maraqlarının təşviqi, təşkilat çərçivəsində əməkdaşlığın dərinləşməsi, İslam həmrəyliyinin möhkəmləndirilməsi və böyük gücə çevrilməsi məqsədilə birgə səylərin səfərbər olunması üçün əlimizdən gələni əsirgəməyəcəyik".