Prezident: İslamın terrorizmlə eyniləşdirilməsi qəbuledilməzdir

Dünyada, xüsusilə Qərb ölkələrində müsəlmanlara qarşı nifrətin aşılanması və İslam dəyərlərinin hədəfə alınması dinc birgəyaşayış prinsipini ciddi şəkildə təhdid edir.

Publika.az xəbər verir ki, bu barədə Azərbaycan Prezidenti İlham Əliyevin İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci Sessiyasının iştirakçılarına ünvanladığı müraciətdə bildirilib.

Dövlət başçısı bəzi beynəlxalq qurumların dinimizə qarşı qərəzli mövqeyini kəskin tənqid edib:

"Müqəddəs kitabımız 'Qurani-Kərim'in yandırılması, Məhəmməd Peyğəmbərin (s.ə.s) karikaturalarının nəşr edilməsi heç bir halda ifadə azadlığı ilə əsaslandırıla bilməz və tamamilə qəbuledilməzdir. Məyusedici haldır ki, Qərbdə bəzi siyasi dairələr, Avropa Parlamenti və Avropa Şurası Parlament Assambleyası kimi beynəlxalq təsisatlar anti-İslam əhvali-ruhiyyəsini təlqin edərək, İslamı ekstremizm və terrorizm ilə eyniləşdirməyə, dinimizə qarşı qərəzli təsəvvür yaratmağa və onu təhlükə mənbəyi kimi qələmə verməyə cəhdlər göstərir".