Prezident bu qanunu təsdiqlədi

Azərbaycanda dövlət-özəl tərəfdaşlığı çərçivəsində həyata keçirilən investisiya layihələrinin torpaq təminatı və maliyyə zəmanəti mexanizmləri sadələşdirilir, layihələrin icrası üçün dövlət torpaqlarının özəl tərəfdaşlara birbaşa icarəyə verilməsi səlahiyyəti İqtisadiyyat Nazirliyinə həvalə olunur.

Publika.az xəbər verir ki, Prezident İlham Əliyev Torpaq Məcəlləsində, habelə torpaq icarəsi, torpaq bazarı, dövlət əmlakının özəlləşdirilməsi, bələdiyyə torpaqlarının idarə edilməsi və tənzimlənən qiymətlər haqqında qanunlarda dəyişiklik edilməsini nəzərdə tutan Qanunu təsdiqləyib.

Bununla yanaşı, dövlət başçısı sözügedən qanunun icrasını təmin etmək məqsədilə Torpaq Məcəlləsinin tətbiqi barədə Fərmanda dəyişiklik edilməsi haqqında yeni Fərman imzalayıb.

Qanunvericiliyə edilən dəyişikliklərə əsasən, dövlət-özəl tərəfdaşlığı layihələrini həyata keçirmək məqsədilə dövlət mülkiyyətində olan torpaq sahələri özəl tərəfdaşa müsabiqə şərtlərinə və bağlanılan müqaviləyə uyğun olaraq birbaşa icarəyə verilə biləcək. Bu addım torpaq bazarı, özəlləşdirmə və bələdiyyə torpaqlarının idarə olunması qaydalarındakı ümumi hərrac və müsabiqə məhdudiyyətlərindən istisna edilib. Həmçinin, biznes mühitinin cəlbediciliyini artırmaq üçün müsabiqənin şərtlər toplusunda nəzərdə tutulduğu təqdirdə, dövlət tərəfindən özəl tərəfdaşa tənzimlənən qiymətlərin (tariflərin) səviyyəsinə dair rəsmi maliyyə təminatı veriləcək.

Prezidentin imzaladığı tətbiq fərmanına əsasən, Torpaq Məcəlləsinin müvafiq maddələrində nəzərdə tutulmuş idarəetmə səlahiyyətləri daxilində dövlət-özəl tərəfdaşlığı layihələri üçün torpaq sahələrinin özəl tərəfdaşa icarəyə verilməsini rəsmən Azərbaycan Respublikasının İqtisadiyyat Nazirliyi həyata keçirəcək. Fərmanla Torpaq Məcəlləsinin icrası ilə bağlı 2000-ci ilə aid köhnə fərmanın strukturu yenidən qruplaşdırılaraq təsnif edilib.