Bu şəxslər genetik olaraq piylənməyə meyllidirlər

Beynəlxalq tədqiqatçılar qrupu müəyyən edib ki, SMIM1 genini sıradan çıxaran genetik variantı olan insanlar istirahətdə daha az enerji sərf etdikləri üçün bədən çəkisi daha yüksəkdir.

Publika.az xəbər verir ki, SMIM1 geni cəmi 10 il əvvəl tədqiqatçılar Vel kimi tanınan xüsusi qan qrupunu kodlayan geni axtararkən müəyyən edilib. Hər 5000 insandan birində genin hər iki nüsxəsi yoxdur, bu da onları Vel-mənfi edir.

Yeni araşdırmanın nəticələri göstərir ki, bu qrupda da artıq çəkili olma ehtimalı yüksəkdir. Tədqiqat nəticəsində məlum olub ki, genin hər iki nüsxəsi olmayan insanlarda piylənmə ilə əlaqəli başqa əlamətlər var, o cümlədən qanda yüksək yağ səviyyəsi, yağ toxumasının disfunksiyası əlamətləri, qaraciyər fermentlərinin səviyyəsinin yüksəlməsi və tiroid hormonlarının səviyyəsinin aşağı olması müşahidə edilir.

Hüceyrə biologiyası üzrə alim Mattia Frontini qeyd edib ki, son 50 ildə piylənmə nisbətləri demək olar ki, üç dəfə artıb. Onun sözlərinə görə, 2030-cu ilə qədər bütün dünyada 1 milyarddan çox insanda piylənmənin kəskin artacağı proqnozlaşdırılır.

Tədqiqatın bir hissəsi olaraq alimlər Böyük Britaniyanın Biobank tədqiqatında 500 minə yaxın iştirakçının genetikasını təhlil edib və 104 nəfərdə SMIM1 geninin variantını müəyyən ediblər.

Alimlər SMIM1 gen variantı olan 4 əlavə insan qrupunda tapdıqları təsirləri araşdırıblar. Onlar bu nəticənin çəkiyə təsir etdiyini, qadınlarda orta hesabla 4,6 kq, kişilərdə isə 2,4 kq artım olduğunu müəyyən ediblər.

Cəmilə