Yaşıl çay ekstraktı arıqlamağınıza kömək edir?

Yaşıl çay ekstraktı əlavələrinin qəbulu əhəmiyyətli çəki itkisinə nail olmağa kömək etmir.

Publika.az xəbər verir ki, bu barədə "Daily Mail"ə Redinq Universitetinin diyetoloqu Günter Kunle məlumat verib.

Mütəxəssisin sözlərinə görə, yaşıl çay uzun müddət arıqlamaq üçün potensial təbii vasitə hesab olunurdu. Onun yağ yandırıcı xüsusiyyətlərinə 16-cı əsrin Çin tibb ədəbiyyatında rast gəlinir. Müasir vitaminlər və pəhriz əlavələri istehsalçıları da guya maddələr mübadiləsini sürətləndirmək üçün tərkibində yaşıl çay ekstraktı olan məhsullar istehsal edirlər.

2016-cı ildə 115 qadın üzərində aparılan araşdırma, həqiqətən də, əlavələrin çəki itkisinə və belin incəlməsinə səbəb olduğunu göstərib. Təcrübə iştirakçıları 12 həftə ərzində gündəlik 800 mq yaşıl çay ekstraktı qəbul ediblər.

Əksinə, artıq çəki və ya piylənmədən əziyyət çəkən şəxsləri tədqiq edən digər bir araşdırma, yaşıl çay əlavəsinin statistik cəhətdən əhəmiyyətli çəki itkisinə səbəb olmadığını aşkar edib.

Diyetoloqun sözlərinə görə, ilk araşdırmanın nəticələrini şübhəli adlandırmaq olar. Bundan əlavə, arıqlama üçün yaşıl çayın faydalarını təsdiqləyən yüksək keyfiyyətli təcrübələr aparılmayıb. Bu o deməkdir ki, çay yarpaqları və ya onların ekstraktı arıqlamaq üçün ənənəvi üsulları əvəz edə bilməz. (Oxu.az)