Bu yemək dünyada 20 min insanın ölümünə səbəb olub

Dünyada 20 min insanın ölümünə səbəb olan yemək kimi tanınan Koi Pla, Tay mətbəxinin məşhur yeməklərindən biridir.

Publika.az xəbər verir ki, çiy balıq və ədviyyatlarla hazırlanan bu yemək sağlamlıq üçün ciddi təhlükələr yaradır. Çiy balıqda mövcud olan Opistorchis viverrini adlı parazit qaraciyər xərçənginə səbəb ola bilər. Bu parazit xüsusilə Cənub-Şərqi Asiya ölkələrində, o cümlədən Tayland, Laos, Kamboca və Vyetnamda geniş yayılıb.

Koi Pla yeməyinin sağlamlığa mənfi təsiri əsasən Taylandın yoxsul bölgələri, xüsusən İsaan və Xon Kaen əyalətlərində müşahidə edilir. Bu bölgələrdə xolangiokarsinoma, yəni öd yolları və qaraciyər şişləri geniş yayılıb. Məhz bu yeməyin həddindən artıq istehlakı səbəbindən Taylandda hər il təxminən 20 min insanın həyatını itirdiyi düşünülür.

Yeməkdə istifadə edilən balıqlar əsasən Mekonq bölgəsindən gətirilir. Bu bölgənin su hövzələrində parazitlərə rast gəlinir və balıqlar bu parazitlərlə yoluxmuş ola bilər. Bu yastı qurdlar insan orqanizmində öd yollarında xəstəliklər yaradır və nəticədə qaraciyər xərçənginə səbəb olur.

Taylandlı həkim Narong Khuntikeo, Koi Pla-nın təhlükələri ilə mübarizə aparmaq üçün ciddi tədbirlər görmüşdür. O, valideynlərini bu yeməyin yaratdığı qaraciyər xərçəngindən itirdikdən sonra insanları xəbərdar etməyə başlamışdır. O, alimlər, həkimlər və antropoloqlarla birgə çalışaraq parazitlərin yayılmasını araşdırmış və insanların sağlamlığını qorumaq üçün tədbirlər həyata keçirmişdir.

Tədqiqat nəticələrinə görə, bəzi kənd icmalarında yaşayanların 80 faizi ölümcül parazitlərlə yoluxmuşdur. Bu problemə qarşı mübarizə çərçivəsində bölgədə ultrasəs aparatları və sidik test dəstləri vasitəsilə parazitlərin yayılması izlənmişdir. Ekspertlər qeyd edir ki, bu tip yeməklərdən uzaq durmaq qaraciyər və öd yolları xərçənginin qarşısını almaqda mühüm rol oynayır. ("e-saglam")