Həkim babasillə bağlı mifi darmadağın etdi

Proktoloq və cərrah Konstantin Korşunov hemoroid haqqında beş ümumi mifi dağıtdı.

Publika.az xəbər verir ki, həkim "Lenta.ru" ilə söhbətində bu xəstəliklə bağlı yanlış fikirləri təkzib edib.

Həkimin söylədiyi ilk mif hemoroidin xərçəngə çevrilə biləcəyi iddiası idi. O, bu xəstəliyin və düz bağırsağın şişlərinin müxtəlif inkişaf mexanizmlərinin olduğunu izah edib. Korşunov əlavə edib ki, tualetə gedərkən qanın görünməsinin yeganə səbəbi hemoroid olması fikri də doğru deyil. Həkim əmin edib ki, bu, bir çox başqa xəstəliklərdən də baş verə bilər.

Korşunov qeyd edib ki, başqa bir mif hemoroidin müalicəsi ilə bağlıdır. Bir çox insanlar məlhəmlərin, süpozituarların və tabletlərin bu xəstəlikdən qurtulmağa kömək etdiyinə inanırlar, lakin əslində onlar yalnız ilkin mərhələdə simptomları aradan qaldırırlar, amma xəstəliyin gedişatına təsir göstərmirlər. Eyni zamanda, əməliyyatın ömürlük hemoroiddən qurtulmağa kömək etdiyi ifadəsi də həmişə doğru deyil: halların təxminən 10 faizində residiv riski var.

Həkim deyib ki, xalq üsulları hemoroiddən qurtulmağa kömək etmir, hətta bəzən sağlamlığa zərər verir.

“Məsələn, zəlilər insandan insana yoluxucu xəstəliklərin daşıyıcısı ola bilər. Zəli tüpürcəklərində olan bakteriyalar infeksiyalara səbəb ola bilər. Zəli tüpürcəyində qanın laxtalanmasının qarşısını alan və qan axınını yaxşılaşdıran bir ferment qanaxmaya səbəb ola bilər. Bu isə tez-tez xəstəxanaya yerləşdirmə tələb edir”, - Korşunov xəbərdarlıq edib.

Adəm