Qəhvənin qadınlar üçün inanılmaz faydası üzə çıxdı

Amerika alimləri müəyyən ediblər ki, orta yaşlarda orta dərəcədə qəhvə istehlakı qadınlarda sağlam qocalma ehtimalını artırır.

Publika.az xəbər verir ki, bu barədə Amerika Qidalanma Cəmiyyəti (ASN) məlumat yayıb.

Tədqiqatda 47 513 qadının sağlamlıq vəziyyətləri təhlil edilib. Onların pəhrizi, həyat tərzi və sağlamlıq vəziyyəti 1984-cü ildən izlənilirdi.

Sağlam qocalma dedikdə idrak funksiyasının, yaddaşın, əqli və fiziki sağlamlığın qorunub saxlanması və ciddi xroniki xəstəliklər olmadan 70 yaşa çatmaq nəzərdə tutulur.

Məlum olub ki, gündə orta hesabla üç kiçik fincan qəhvə (təxminən 315 mq kofein) içən qadınların qocalığı sağlam keçirmək ehtimalı daha yüksəkdir. Gündə hər əlavə qəhvə fincanı (beş fincana qədər) “sağlam yaşlanma” şansını 2-5% artırır.

Kofeinsiz çay və ya qəhvədə isə oxşar fayda müşahidə edilməyib. Bunun əksinə olaraq, kola kimi şəkərli və qazlı içkilərin tərkibindəki kofeinə baxmayaraq sağlam qocalma ehtimalını 20-26% azaltdığı bildirilir.

Alimlər vurğulayırlar ki, orta dərəcədə qəhvə istehlakı, xüsusən də aktiv həyat tərzi, sağlam qidalanma və siqaret çəkməməklə birləşdirildikdə çox daha yaxşı effekt verir.

Bununla belə, onlar həddindən artıq kofein istehlakından çəkinməyi tövsiyə edirlər, çünki fərdi dözümlülük çox fərqli ola bilər.

“Nəticələrimiz göstərir ki, qocalmağa müsbət təsir edən təkcə tərkibindəki kofein deyil, qəhvənin özüdür. Biz qəhvənin tərkibində olan hansı maddələrin bu proseslərdə iştirak etdiyini və onların genetik faktorlarla necə qarşılıqlı əlaqədə olduğunu anlamaq üçün əlavə tədqiqatlar planlaşdırırıq”, - deyə tədqiqata rəhbərlik edən Toronto Universitetinin dosenti Sarah Mahdavi bildirib.

Ləman