Yağlı qidalar niyə kişilərə daha çox zərər verir?

Alimlər yağlı qidaların kişilər üçün niyə daha zərərli ola biləcəyini aydınlaşdırıblar.

Publika.az xəbər verir ki, həddən artıq yağlı qidalar yemək kişilərin maddələr mübadiləsinə qadınlardan daha çox dağıdıcı təsir göstərə bilir.

Massaçusets Texnologiya İnstitutunun (MIT) alimləri belə qənaətə gəliblər. Araşdırmanın nəticələri "Molecular Cell" jurnalında dərc olunub.

Bildirilib ki, buna səbəb yağların, şəkərlərin və zülalların emalı üçün cavabdeh olan fermentlərin fəaliyyətini tənzimləyən biokimyəvi mexanizm prosesidir.

Araşdırma zamanı siçanların qaraciyər hüceyrələrinin təhlili göstərib ki, yüksək yağlı pəhriz yüzlərlə belə fermentin fəaliyyətində ciddi pozuntulara səbəb olur. Eyni zamanda, reaktiv oksigen növlərinin (həddindən artıq miqdarda hüceyrələrə zərər verən və iltihabı təşviq edən molekullar) sürətlə formalaşır.

Yağlı qidalarla qidalanan siçanlarda bu dəyişikliklər fonunda insulinə həssaslığın azaldığı və bədən çəkisinin artdığı müşahidə edilib. Bundan əlavə, gəmiricilərin hüceyrələri orqanizmi zəhərli birləşmələrdən qoruyan kritik mexanizm olan redoks sistemindəki tarazlığı itirib.

Xüsusilə diqqətəlayiq məqam erkək siçanların dişilərə nisbətən daha həssas olması idi. Tədqiqatçıların fikrincə, dişilərin yağların emalı üçün alternativ yollara keçməyə və ciddi nəticələrdən qaçmağa imkan verən kompensasiya mexanizmləri var.

Alimlər həmçinin müəyyən ediblər ki, pəhrizə antioksidantlar əlavə edildikdə, yağlı qidaların zərərli təsirləri xeyli zəifləyir.

Onlar bu araşdırmanın antioksidant terapiyadan istifadə etməklə metabolik pozğunluqların qarşısının alınması və müalicəsi üçün yeni perspektivlər açmasını ümid edirlər.

Ləman