İynə-dərmanla arıqlamağa son! - Yapon alimlərindən inanılmaz kəşf

Yapon alimləri arıqlamaq istəyənlər üçün inanılmaz üsul hazırlayırlar.

Publika.az xəbər verir ki, onların hazırladığı üsul piylənmə və diabetin müalicəsinə yanaşmanı kökündən dəyişə bilər.

Osaka Universitetinin alimləri arıqlamaq üçün məşhur dərmanların müntəzəm inyeksiyası əvəzinə birdəfəlik genetik müdaxilə təklif edirlər. Belə ki, bundan sonra orqanizm özü lazımi maddəni istehsal etməyə başlayacaq.

Tədqiqat "Communications Medicine"jurnalında dərc olunub.

Alimlər tədqiqat zamanı xəstəliyə səbəb olan mutasiyaları düzəltməyə kömək edən gen terapiyasına bənzər üsuldan yararlanıblar. Bu dəfə siçanların qaraciyər hüceyrələrinə iştahı azaldan və maddələr mübadiləsini yaxşılaşdıran GLP-1 hormonunun analoqu olan eksenatidi kodlayan yeni gen əlavə olunub. Eksenatid diabet və kilo itkisinin müalicəsi üçün artıq təsdiqlənmiş dərmanlarda da istifadə olunur, lakin adətən müntəzəm olaraq tətbiq edilməlidir.

"Bizim yanaşma gen terapiyası ilə bioloji dərmanların üstünlüklərini birləşdirir", - deyə tədqiqatın rəhbəri Keyiçiro Sudzuki bildirib.

Yeni müalicə üsulu tətbiq olunan siçanların qanında uzun müddət stabil eksenatid səviyyəsi qorunub. Heyvanlar heç bir əlavə müdaxilə olmadan daha az yeməyə və arıqlamağa başlayıblar, həmçinin onların orqanizmi qlükozanı daha yaxşı mənimsəməyə başlayıb.

“Biz göstərdik ki, orqanizmə bir gen daxil edə bilərsiniz və hüceyrələr özləri bir neçə ay ərzində daimi inyeksiyalara ehtiyac olmadan istənilən dərmanı istehsal etməyə başlayacaqlar”, - tədqiqatın rəhbəri qeyd edib.

Onun sözlərinə görə, heç bir əks təsir qeydə alınmayıb.

Alimlər qeyd edirlər ki, bu üsul təkcə piylənmənin deyil, həm də spesifik genetik mutasiyalarla əlaqəli olmayan digər xroniki xəstəliklərin, məsələn, 2-ci tip diabet və iltihablı xəstəliklərin müalicəsi üçün də uyğun ola bilər.

Metodun effektivliyi sonrakı tədqiqatlarda təsdiqlənərsə, bu, xəstələrin həyat keyfiyyətini yaxşılaşdıracaq və onları müntəzəm inyeksiya ehtiyacından azad edəcək.

Ləman