Dünyanın ən böyük ağcaqanad fabriki bu ölkədə açıldı: Məqsəd nədir?

Həftədə 190 milyona qədər həşərat istehsal edə bilən dünyanın ən böyük ağcaqanad yetişdirmə fabriki Braziliyanın San-Paulu ştatının Kampinas şəhərində fəaliyyətə başlayıb. Fabrikin tikintisi ölkədə "danq qızdırması" ilə mübarizə üzrə genişmiqyaslı proqramın bir hissəsidir.

Publika.az xəbər verir ki, bu barədə "Oddity Central" məlumat yayıb.

1300 kvadratmetrlik obyekt zərərsiz "Wolbachia" bakteriyasına yoluxmuş "Aedes aegypti" ağcaqanadlarını yetişdirmək üçün istifadə olunur ki, bu da ağcaqanadların içərisində "danq virusu"nun çoxalmasına mane olur. Təbiətə buraxıldıqdan sonra bu ağcaqanadlar virusu insanlara ötürə bilmir və onların nəsilləri də bu qoruyucu xüsusiyyəti miras alırlar.

Yetişdirmə prosesi diqqətlə idarə olunur: sürfələr əvvəlcədən müəyyən edilmiş temperaturda su ilə doldurulmuş xüsusi qablarda böyüyür. Yetkin erkəklərə şirin məhlul, dişilərə isə insan dərisini simulyasiya edən torbalarda heyvan qanı verilir. Ağcaqanadlar qəfəslərdə təxminən bir ay yaşayır, bu müddət ərzində onlar çoxalır və yumurta qoyurlar, bu isə növbəti dövrün başlaması deməkdir.

Mütəxəssislərin fikrincə, bu üsul artıq bir sıra ölkələrdə effektivliyini sübut edib, lakin Braziliya onu belə geniş miqyasda istifadə edən ilk ölkədir. Bu, xəstəliyin görünməmiş epidemiyası ilə əlaqədardır: 2024-cü ildə Braziliyanın payına dünyada qeydə alınan bütün "danq xəstəliyi"nə yoluxma hallarının 80%-dən çoxu düşür.

Yeni fabrikin gücü ona hər il 100 milyona qədər insanı profilaktik müalicə etmək üçün kifayət qədər ağcaqanad istehsal etməyə imkan verəcək.

Adəm