Maddələr mübadiləsini yaxşılaşdırmağın ən asan yolu tapıldı

Oturma vaxtını gündə cəmi yarım saat azaltmaq orqanizmin enerji üçün yağ və karbohidratlardan istifadə etmək qabiliyyətini əhəmiyyətli dərəcədə yaxşılaşdırır.

Publika.az xəbər verir ki, bu barədə Finlandiyanın Turku Universitetinin alimləri müəyyən ediblər.

"Scandinavian Journal of Medicine & Science in Sports" jurnalında dərc olunan araşdırmada qeyd olunub ki, hətta qısa gəzinti və ya ayaq üstə telefonla zəng etmək kimi yüngül fəaliyyət belə metabolik çevikliyi - bədənin enerji mənbələri arasında keçid qabiliyyətini bərpa etməyə kömək edir.

Təcrübədə ürək-damar xəstəlikləri və tip 2 diabet riski yüksək olan 64 oturaq insan iştirak edib. Altı aydan sonra oturma vaxtını ən azı 30 dəqiqə azaldanlar, yüngül fiziki fəaliyyət zamanı maddələr mübadiləsi sürətini və yağ yandırmaq qabiliyyətini yaxşılaşdırıblar.

Bildirilir ki, müsbət təsir xüsusilə kilolu və fiziki cəhətdən aktiv olmayan insanlarda özünü göstərir. Oturaq vaxtı minimuma endirmək belə diabet və ürək xəstəliklərinin qarşısını almaq üçün ilk addım ola bilər.

Adəm