Bənövşəyi meyvə və tərəvəzlərin daha 2 faydası üzə çıxdı

Bənövşəyi rəngli tərəvəz və meyvələrin iki gözlənilməz faydası aşkarlanıb.

Publika.az xəbər verir ki, bunu Polşanın Nikolay Kopernik Universitetinin alimləri üzə çıxarıblar.

Onlar müəyyən ediblər ki, meyvə və tərəvəzlərə bənövşəyi rəng verən piqmentlər (antosiyaninlər) fiziki fəaliyyətdən sonra orqanizmin daha tez bərpa olunmasına kömək edir və hüceyrələri yaşa bağlı dəyişikliklərdən qoruyur.

Araşdırmanın nəticələri "Nutrients" jurnalında dərc olunub.

Antosiyaninlər qaragilə, qara qarağat, qırmızı kələm, bənövşəyi şirin kartof və digər "bənövşəyi" rəngli qidalarda olur. Bu maddələr antioksidant müdafiəni aktivləşdirir, iltihabı azaldır, ürək və qan damarlarına faydalı təsir göstərir.

Alimlər izah edir ki, antosiyaninlər Nrf2 və NF-κB daxil olmaqla, mühüm hüceyrə yollarına təsir göstərir. Bu siqnal mexanizmləri iltihabi proseslərin tənzimlənməsində iştirak edir və hüceyrələrdə məşqlərdən, eləcə də sürətlənmiş qocalmadan sonra toxuma zədələnməsinin əsas amili olan oksidləşdirici stresslə mübarizə aparır.

Bu qidaları müntəzəm olaraq öz rasionlarına daxil edən könüllülər idmana daha sürətli reaksiya və xroniki xəstəliklərə qarşı ümumi müqavimət göstəriblər.

Bununla belə, antosiyaninlərin effektivliyi məhduddur: bu maddələrin təxminən 2% -i bədən tərəfindən udulur. Alimlər hazırda antosiyaninləri orqanizm üçün daha əlçatan etməyin yollarını axtarırlar. Tədqiqatçılar C vitamininin (askorbin turşusu) bu birləşmələrin udulmasını yaxşılaşdıra biləcəyini də aşkar ediblər.

Ləman