Diş itkisi ölüm riskini artırır

Yeni bir araşdırma yaşlı insanlarda dişlərin sürətlə itirilməsinin ölüm riskinin artması ilə əlaqəli olduğunu göstərib.

Publika.az xəbər verir ki, çinli alimlər 3,5 il ərzində 8073 yaşlı insanı izləyərək belə nəticəyə gəliblər.

Tədqiqatın nəticələrinə görə, dişlərin itirilmə sürəti nə qədər yüksəkdirsə, bütün səbəblərdən ölüm riski də bir o qədər artır. Bu əlaqə yaş, cins, təhsil, içki və məşq vərdişləri kimi digər amillər nəzərə alındıqdan sonra da qalır.

Mütəxəssislər bildirirlər ki, dişlərin itirilməsi birbaşa ölümə səbəb olmur, lakin diş itkisinə yol açan sağlamlıq problemləri, məsələn, iltihab, pis qidalanma və ürək xəstəlikləri ömrü qısalda bilər.

Alimlər diş itkisinin insanın ümumi sağlamlıq vəziyyətini qiymətləndirmək üçün göstərici kimi istifadə oluna biləcəyini vurğulayırlar. Həkimlər dişlərin qorunması üçün müntəzəm diş həkimi müayinəsini, gündə iki dəfə fırçalamağı və siqaretdən uzaq durmağı tövsiyə edirlər.

Qeyd edək ki, araşdırma “BMC Geriatrics” jurnalında dərc olunub.