Bu ağrınız varsa, xərçəngin əlaməti ola bilər - Onkoloq

Öskürək və sinə ağrısı ağciyər xərçəngində dərhal özünü göstərmir.

Publika.az xəbər verir ki, bu barədə “Daily Mail” qəzetinə onkoloq Ceyms Uilson açıqlama verib.

Onun sözlərinə görə, ağciyər toxumasında demək olar ki, sinir lifləri yoxdur. Bu səbəbdən xərçəng sinirlərə və ya digər orqanlara yayılana qədər uzun müddət hiss olunmadan inkişaf edə bilər. Həkim qeyd edib ki, ağciyəri əhatə edən plevra qatında sinir şəbəkəsi mövcuddur və şiş həmin qata çatdıqda və ya orqanın kənarında yerləşdikdə ağrı yaranmağa başlayır.

Uilsonun sözlərinə görə, ağciyər xərçəngi bəzən sinə deyil, çiyin nahiyəsində ağrı ilə özünü göstərə bilər. Bu, adətən şiş diafraqmanı qıcıqlandırdıqda baş verir. Onkoloq izah edib ki, diafraqmaya gedən sinirlər boyun nahiyəsindən başlayaraq çiyindən keçir və beyin ağrının mənbəyini düzgün təyin edə bilmir.

O əlavə edib ki, xərçəngin limfa düyünlərinə yayılması da çiyin ağrısına səbəb ola bilər. Bununla belə, həkim vurğulayıb ki, ağrı adətən xəstəliyin sonrakı mərhələlərində ortaya çıxır və erkən diaqnoz üçün müntəzəm tibbi müayinələr vacibdir.

Adəm