Bu qidalar döş xərçəngi riskini azaldır

Sitrus meyvələrindəki C vitamini, qoz-fındıqdakı maqnezium, yarpaqlı göyərtilərdəki B2 vitamini və yaşıl tərəvəzlərdəki kalsium döş xərçəngi riskini azalda və xəstəliyin diaqnozundan sonra sağ qalma müddətini uzada bilər.

Publika.az xəbər verir ki, bu barədə Çin alimlərinin tədqiqatları “Frontiers in Nutrition” jurnalında dərc olunub.

Nəticələr göstərir ki, sağlam bitki əsaslı pəhrizə ən çox riayət edən qadınlarda döş xərçənginə tutulma riski, ən az riayət edənlərlə müqayisədə 11% aşağıdır. Artıq xəstəlik diaqnozu qoyulmuş qadınlar arasında yüksək Sağlam Bitki Əsaslı Pəhriz İndeksi (HPDI) balı ümumi ölüm riskinin 28% azalması ilə əlaqələndirilib.

Mikroelementlərin ayrıca təhlili də göstərib ki, kalsium, maqnezium, mis və C vitamininin daha yüksək qəbulu xəstəliyin inkişaf riskini azaldır. Artıq xərçəng diaqnozu qoyulmuş qadınlar arasında kalsium, maqnezium, fosfor və B2 vitamini (riboflavin) səviyyəsinin yüksək olması ölüm riskini azaldır. Əksinə, yüksək natrium (xörək duzu) qəbulu ölüm nisbətinin 15% artması ilə əlaqələndirilib.

Tədqiqat müəllifləri qeyd ediblər ki, bu müşahidə xarakterli araşdırmadır və birbaşa səbəb-nəticə əlaqəsini sübut etmir. Buna baxmayaraq, nəticələr göstərir ki, qidalanma döş xərçəngində risk və proqnoz amili kimi dəyişdirilə bilən əhəmiyyətli faktor ola bilər.

Adəm