Qış günündə qaza həsrət qalan sakinlər - ŞİKAYƏT

Nəsimi rayonu Şamil Əzizbəyov 88 b küçəsinin sakini redaksiyamıza şikayət məktubu ünvanlayıb. Şikayətçi məktubunda bir həftədir ki, bu ərazidə qaz olmamasından gileylənib. Sakinin sözlərinə görə, bir həftədir ki, sözügedən ərazidə qazın kəsilməsinə baxmayaraq aidiyyəti qurumun təmsilçiləri nə bunun səbəbini izah edir, nə də ki, mavi yanacağın nə zaman veriləcəyi barədə bir söz deyir. Hər halda soyuq qış günü qaz olmayan evdə yaşamaq heç də asan olmaz.

Biz də, öz növbəmizdə Publika.az olaraq soyuq qış günləri sakinlərin qazının nə üçün kəsilməsinin, habelə niyə bir həftədir ki, onların qaza həsrət saxlanılmalarının səbəbini araşdırdıq.

Bununla bağlı “Azəriqaz” İB-nin mətbuat xidmətinin rəhbəri İbrahim Kərbəlayevlə əlaqə saxladıq.

O, Nəsimi rayonunun sözügedən ünvanında belə bir faktın qeydə alınmadığını dilə gətirdi: “O ünvana bir həftə ərzində qazın verilməməsi barədə hər hansı bir fakt yoxdur. Yalnız bu gün Şamil Əzizbəyov küçəsində qaz tənzimləyici qurğular üzərində müəyyən təmir işləri aparıldığı üçün qazın verilişində azalma yaranıb. Yəni qaz tamamilə kəsilməyib, sadəcə müəyyən qədər azaldılıb”.

İbrahim Kərbəlayev onu da qeyd edib ki, təmir işlər saat 18.00 kimi bitəcək və qazın verilişi tamamilə bərpa olunacaq.

Mələk