Metropoliten rəhbərliyi sərnişinləri yalançı çıxardı: Ola bilməz

Metronun xidmətindən yararlanan sərnişinlər redaksiyamıza müraciət edərək bildirirlər ki, son zamanlar “Avtovağzal ” və “Memar Əcəmi ” metro stansiyaları arasında qatarların hərəkət intervalında gecikmələr müşahidə olunur.

Belə ki, gecikmələr stansiyalararası nəzərdə tutulan hərəkət intervalı ilə kəskin şəkildə fərqlənir. Bəzən qatarların 10-12, hətta 15 dəqiqə intervalla gəlməsi insanların, xüsusilə səhər saatlarında işə gedənlərin, şagird və tələbələrin narazılığına səbəb olur. Onları belə bir sual düşündürür: qatarlar niyə gecikir?

Məsələni aydınlaşdırmaq üçün aidiyyəti qurumla əlaqə saxladıq. Lakin “Bakı metropoliteni” Qapalı Səhmdar Cəmiyyətindən ənənəvi cavab aldıq.

“Bakı Metropoliteni”nin Mətbuat xidmətinin rəhbəri Bəxtiyar Məmmədov Publika.az-a bildirib ki, hərəkət intervalında kobud pozuntu olmayıb. Qurum rəsmisinin sözlərinə görə, dekabr ayı ərzində “Xocəsən” stansiyasından qatarlar hərəkətə başlayanda, qatarların giriş-çıxışı yoxlanıldığı üçün stansiyalararası interval 6-8 dəqiqə arası dəyişirdi, qatarlar daha tez-tez gəlib:

“Amma hazırda “Avtovağzal” və “ Memar Əcəmi” stansiyası arasında olan interval 8 dəqiqə nəzərdə tutulub və gecikmələr müşahidə olunmur”.

Ayşən Rəhim