Əziz Orucovla bağlı bu ittihama xitam verildi

“Kanal 13” internet televiziyasının həbsdə olan rəhbəri Əziz Orucova elan olunan ittihamlardan biri götürülüb.

Publika.az xəbər verir ki, bu barədə vəkil Bəhruz Bayramov APA-ya bildirib.

O qeyd edib ki, ona Cinayət Məcəlləsinin 206.3.2-ci (qaçaqmalçılıq-qabaqcadan əlbir olan bir qrup şəxs tərəfindən törədildikdə) maddəsi üzrə elan olunan ittihama xitam verilib.

Qeyd edək ki, Əziz Orucovla bağlı başlanmış cinayət işi üzrə ibtidai istintaq başa çatıb. İş baxılması üçün Səbail rayon Məhkəməsinə göndərilib və hakim Günel Səmədovanın icraatına verilib.

Ə. Orucov hazırda Cinayət Məcəlləsinin 188.2-ci (Qanunla müəyyən edilmiş mülkiyyət, istifadə və ya icarə hüququ olmadan torpaq sahəsi üzərində özbaşına tikinti) maddəsi ilə ittiham olunur.

Xatırladaq ki, Əziz Orucov ötən il noyabrın 27-də saxlanılıb. Ona qarşı əvvəlcə Cinayət Məcəlləsinin 188.2-ci (Qanunla müəyyən edilmiş mülkiyyət, istifadə və ya icarə hüququ olmadan torpaq sahəsi üzərində özbaşına tikinti) maddəsi ilə cinayət işinin açılıb.

Daha sonra Cinayət Məcəlləsinin 206.3.2-ci (qaçaqmalçılıq-qabaqcadan əlbir olan bir qrup şəxs tərəfindən törədildikdə) maddəsi ilə əlavə ittiham irəli sürülüb.