Əvvəl 13 min idi, indi isə... - Avtomobillər bahalaşır

Sumqayıt avtomobil bazarında son günlər durğunluq müşahidə olunur. Əvvəllər adam əlindən tərpənmək mümkün olmayan bazarda hazırda sakitlik hökm sürür.

Publika.az xəbər verir ki, satıcıların sözlərinə görə, bunun əsas səbəblərindən biri avtomobillərin qiymətlərinin bahalaşmasıdır.

Satıcılar bildirirlər ki, əvvəllər 13 min manata satılan avtomobillər indi təxminən 15 min manata təklif olunur:

“Qiymətlər ümumilikdə 2000–3000 manat bahalaşıb”.

Oxşar vəziyyət Tovuzda da müşahidə edilir. Qiymətlərin yüksək olması səbəbindən alıcılar demək olar ki, bazara gəlmirlər.

Məsələ ilə bağlı avtomobil satışı üzrə mütəxəssis Sərxan Qədirov bildirib ki, ikinci əl bazarında hazırda durğunluq olsa da, yaz aylarına doğru canlanma gözlənilir.

Onun sözlərinə görə, əvvəlki dövrlə müqayisədə bəzi modellərə tələb artsa da, yanvar ayından sonra Çin istehsalı avtomobillərə maraq azalıb.

Ekspert əlavə edib ki, yaxın aylarda avtomobil qiymətlərində artım ehtimalı da var. Bahalaşma yalnız ikinci əl avtomobillərdə deyil, yeni modellərdə də özünü göstərə bilər.(milli.az)