Aclıqdan ölən siyasi məhbusun oğlundan Paşinyana SƏRT SÖZLƏR: “Arvadınızın və oğlunuzun...”

“Ermənistan qartalları - Vahid Ermənistan” partiyasının sədr müavini, “haynews.am” saytının rəhbəri Mqer Yeqiazaryan saxlanıldığı “Nubaraşen” həbsxanasında keçirdiyi 44 günlük aclıq aksiyası nəticəsində öləndən sonra onun oğlu Vazqen Yeqiazaryan Ermənistanın baş naziri və parlamentin bir qrup deputatına açıq məktub ünvanlayıb.

Publika.az xəbər verir ki, oğul Yeqiazaryan hakimiyyəti atasının ölümündə günahlandırır.

“Nikol Paşinyan, sizin bu cinayət işinə müdaxilənizin səviyyəsini biz, yəqin ki, sonadək tam bilməyəcəyik. Amma siz “nə olursa-olsun, bu adamı həbsə atmaq lazımdır” prinsipi ilə çıxış edərək davranmısınızsa, onda diləyirəm ki, mənimlə qardaşımın və anamın çəkdiyi bütün əzablar sizin həyat yoldaşınız və oğlunuzun da başına gəlsin və onlar da eyni təcrübəni yaşasınlar. Unutmayın ki, icraçılar şəxsən sizə yox, sizin vəzifənizə, kreslonuza tabedirlər. Bu kreslo bu gün sizdədir, sabah isə...”, - deyə məktubda qeyd olunur.

Qeyd edək ki, Mqer Yeqiazaryan Nikol Paşinyanın hakimiyyətinə qarşı çıxdığı üçün qondarma ittihamla həbs olunmuşdu.

Asif