Parlament Zurabişvilinin qoyduğu vetonu ləğv edə bilər, amma...

Gürcüstan parlamenti sadə səs çoxluğu ilə prezident Salome Zurabişvilinin xarici agentlər haqqında qanuna qoyduğu vetonu ləğv edə bilər.

Publika.az xəbər verir ki, bu barədə Civil Georgia yazır .

Hakim “Gürcü arzusu” partiyasının 84 səsi var, lakin vetonu ləğv etmək üçün cəmi 72 səs lazımdır.

“İndi əsas sual ondan ibarətdir ki, “Gürcü arzusu” vetonu ləğv etmək qərarına gələcək, yoxsa qanunu sentyabr ayına qədər təxirə salacaq”, - xəbər müəllifləri əlavə ediblər.

Bundan əvvəl Salome Zurabişvili xarici agentlərlə bağlı qanun layihəsinə veto qoyub.

Mayın 14-də Gürcüstan parlamenti xarici agentlər haqqında qanunu üçüncü oxunuşda qəbul edib. Müzakirə hakim “Gürcü Arzusu” partiyasının deputatları ilə müxalifət arasında etirazlar və davalar fonunda baş tutub. Nəticədə 84 deputat lehinə, 30-u əleyhinə səs verib.

Qəbul edilmiş qanuna əsasən, gəlirlərinin 20%-dən çoxu xaricdən gələn bütün qeyri-kommersiya hüquqi şəxsləri və kütləvi informasiya vasitələri xüsusi dövlət reyestrində qeydiyyatdan keçməlidirlər. Bundan əlavə, belə QHT və KİV-lərdən hər il Gürcüstan Maliyyə Nazirliyinə gəlir və xərclər haqqında deklarasiya təqdim etmələri tələb olunacaq.

Hüseyn İbadlı