Paşinyandan SƏRT GEDİŞ: "Qalstanyanla "məşğul olun""

"Paşinyan “Vətən uğrunda Tavuş” hərəkatı və şəxsən hərəkatının lideri, Erməni Apostol Kilsəsinin Tavuş Yeparxiyasının rəhbəri, arxiyepiskop Baqrat Qalstanyanla birbaşa "məşğul olunması" ilə bağlı göstəriş verib".

Publika.az xəbər verir ki, bunu NEWS.am saytının müxbiri ilə söhbətində politoloq Argişti Kiviryan deyib.

"Vəziyyət dəyişməsə, onun həbslər üçün müraciət edə biləcəyini istisna etmirəm, o cümlədən Baqrat Qalstanyanın həbsi üçün", - Kiviryan deyib.

"Hakimiyyət kilsə institutunu məhv etmək məqsədini gizlətmir. Bu, onların məhv edə bilmədiyi sonuncu qurumdur. O, bütün digər qurumları, o cümlədən hüquq-mühafizə orqanlarını uğurla məhv etdi. Onlar artıq 2018-ci ildə kilsə üzərində hakimiyyəti ələ keçirməyə cəhd ediblər və indi yenidən cəhd etmək üçün yeni səbəb var.

Ancaq görünür, onlar tarixi yaxşı bilmirlər və bilmirlər ki, heç kim, hətta Stalin rejimi belə, erməni kilsəsini dağıtmağa müvəffəq olmayıb, çünki orada lazımi siyasi və diplomatik bacarıqlar toplanıb. Əgər totalitar rejim erməni kilsəsini dağıda bilmədisə, o zaman Paşinyan və onun bel çantalılarının uğur qazanacağını düşünmürəm”, - Kiviryan bildirib.

O, əmindir ki, Paşinyan “Vətən uğrunda Tavuş” hərəkatını qarşısında təhlükə olaraq görür.

“Hakimiyyətin isteriyası bunu sübut edir. Amma arxiyepiskop Baqrat Qalstanyanın hərəkatı olmasa belə, Paşinyan nə vaxtsa kilsə məsələləri ilə məşğul olardı”, - ekspert yekunlaşdırıb.

Hüseyn İbadlı